Policia e Kosovës shënon 26-vjetorin e themelimit

Më 6 shtator 2025, në Prishtinë, Policia e Kosovës shënoi 26-vjetorin e themelimit përmes një ceremonie solemne, ku me ftesë të Drejtorit të Përgjithshëm të Policisë së Kosovës, Gazmend Hoxha, morën pjesë udhëheqësit më të lartë institucional të vendit, Presidentja Vjosa Osmani, Kryetari i Kuvendit Dimal Basha, Kryeministri në detyrë Albin Kurti, Ministri në detyrë i Punëve të Brendshme Xhelal Sveçla, përfaqësues të korit diplomatik, drejtues të institucioneve të sigurisë vendore e ndërkombëtare, si dhe familjarë të policëve, heronjve të rënë në detyrë.

Në këto 26 vite, Policia e Kosovës është konsoliduar si një ndër shtyllat kryesore të sigurisë së shtetit, duke u përballur me sfida të shumta, nga fenomenet kriminale e terroriste, deri te cenimet e rendit kushtetues në veri të vendit, të cilat i ka menaxhuar me profesionalizëm dhe i ka tejkaluar me sukses. Në këtë periudhë, PK-ja është shquar për rezultate të larta operacionale, zhvillim profesional dhe rritje të besimit publik. Për herë të parë me rastin e këtij përvjetori u lancua Monografia e PK-së, e cila iu dhurua personaliteteve të larta shtetrore..

Policia e Kosovës mbetet e përkushtuar të garantojë siguri për të gjithë qytetarët pa dallim, të forcojë transparencën dhe integritetin institucional, si dhe të respektojë me përpikëri ligjin dhe të drejtat themelore të njeriut, duke ruajtur pozitën e saj si një nga institucionet më të besuara dhe transparente të vendit.

Në këtë ditë të shënuar, me nderim e mirënjohje të përjetshme u kujtuan policët e rënë në krye të detyrës, të cilët me sakrificën supreme vulosën sovranitetin, rendin dhe sigurinë e Republikës së Kosovës.

Policia e Kosovës falënderon qytetarët për mbështetjen dhe besimin e vazhdueshëm ndër vite, duke riafirmuar zotimin për të qenë gjithmonë në shërbim të tyre dhe të Republikës së Kosovës.