Arkivi i Kamenicës synon digjitalizimin e plotë të dokumenteve deri në 2027
KAMENICË – “Arkivat janë memoria e gjallë e qytetit tonë, dëshmia e identitetit dhe historia e secilit prej nesh”. Me këto fjalë është hapur sot prezantimi i mbajtur nga Komuna e Kamenicës, respektivisht nga Drejtoria për Kulturë, Rini dhe Sport – DKRS.
Gjatë takimit, përgjegjësi i Sektorit të Arkivit Komunal, z. Arsim Dërmaku, ka prezantuar profilin institucional të arkivit si dhe planin e punës për vitin 2027. Fokusi kryesor i planit është modernizimi i shërbimeve dhe ruajtja më e mirë e trashëgimisë dokumentare të komunës.
Sipas z. Dërmaku, viti 2027 pritet të shënojë një kthesë për arkivin komunal përmes disa nismave kryesore:
1. Digjitalizimi i dokumenteve
Kalimi në epokën digjitale me qëllim që të dhënat të bëhen më të qasshme për qytetarët dhe më të sigurta nga dëmtimi.
2. Lehtësimi i shërbimeve për qytetarët
Shkurtimi i procedurave për lëshimin e dokumenteve arkivore dhe qasje më e shpejtë dhe efikase për të gjithë kërkuesit.
3. Krijimi i kushteve më të mira të ruajtjes
Përmirësimi i standardeve të konservimit për të mbrojtur fondin historik ndër dekada.
4. Aktivitete edukative
Organizimi i nismave dhe punëtorive për të afruar të rinjtë, studentët dhe studiuesit me thesaret dokumentare që ruhen në arkivin e Kamenicës.
Prezantimi është mbajtur në ambientet e Komunës së Kamenicës dhe ka mbledhur përfaqësues të institucioneve lokale dhe të shoqërisë civile.
