Pensionohet Sekretari i Kuvendit të Komunës së Gjilanit, Sadri Arifi – merr vlerësime për punën e tij nga kuvendarët
Sot është pensionuar sekretari i Kuvendit Komunal në Gjilan, z. Sadri Arifi. Lajmin e ka bërë të ditur Kryesuesi i Kuvendit Komunal, Kushtrim Kadriu, i cili njëherit e ka uruar z. Arifi me rastin e pensionimit.
Në urimin e tij vëhet në spikamë puna, angazhimi, vlerësimi e përkushtimi i z. Arifi si sekretar permament e shumëvjecar në Kuvendin e Komunës së Gjilanit.
“Me z. Arifi kam bashkëpunuar në shumë procese dhe gjithmonë ka treguar profesionalizëm dhe këmbëngulje në ruajtjen e ligjshmërisë së Asamblesë sonë. Z. Arifit i urojmë një pension të shëndetshëm dhe të qetë< ka shkruar në urimin e tij, z. Kadriu.
Me rastin e pensionimit të z. Arifi, atë e kanë uruar edhe këshilltarë tjerë komunal si dhe shefa të partive të përfaqësuara në KK Gjilan.
Njëri nga ta, Bujar Nevzadi nga radhët e PDK-së, tha se pas një pune shumëvjeçare, me ndjenja të përziera respekti dhe mirënjohjeje, është përjellur në pension një njeri i veçantë, z. Sadri Arifi, duke vënë në dukje se ka qenë mik permanent dhe bashkëpunëtor i çmuar.
“Gjatë gjithë viteve të punës së tij, z. Arifi u tregua shembull i përkushtimit, korrektësisë dhe profesionalizmit. Me fjalë të urta, me qasje të matur dhe gjithmonë i gatshëm për të ndihmuar, ai e ka lënë gjurmën e tij jo vetëm në institucionin e Komunës, por edhe në zemrat e të gjithë atyre që patën fatin ta njohin e të punojnë me të”, nënvizoi z. Nevzadi, ndërsa theksoi se me të ka qenë përvec kolegë, edhe mik i vërtetë, si dhe bashkudhëtar në punë të përditshme.
