Pas kërcënimeve nga ISIS, rritet siguria në ndeshjet e Ligës së Kampionëve
Siguria do të rritet në ndeshjet e Ligës së Kampionëve këtë javë pasi një media që mbështet grupin e Shtetit Islamik publikoi kërcënime ndaj vendeve të ndeshjes.
UEFA tha se ishte në dijeni të kërcënimeve, por shtoi se ndeshjet në Madrid, Paris dhe Londër do të zhvillohen siç ishte planifikuar.
Një kanal mediatik pro-IS-it ka publikuar postera të shumtë që bëjnë thirrje për sulme në stadiumet që presin ndeshjet çerekfinale të martën dhe të mërkurën.
Ministrat në Francë dhe Spanjë kanë konfirmuar masa të shtuara sigurie.
Ministri i Brendshëm francez Gérald Darmanin tha se do të kishte masa sigurie “të përforcuara në mënyrë të konsiderueshme” kur PSG të luajë kundër Barcelonës në Paris të mërkurën.
Sipas BBC, Darmanin shton se ”Unë do t’ju kujtoj se vetëm 10 ditë më parë, IS ndau një fotografi të stadiumit të Mynihut dhe tha se duhet të ndërmerren veprime kundër mjediseve sportive që presin lojëra futbolli – megjithëse të gjitha sportet mund të jenë në shënjestër”.
”Duke pasur parasysh se sa e rëndësishme është Champions League për futbollin, sigurisht që po flasim me partnerët tanë”.
Dy ndeshje do të zhvillohen në Madrid këtë javë.
Real Madrid do të luajë kundër Manchester City të martën, ndërsa Atletico Madrid do të përballet me Borussia Dortmund të mërkurën.
Pilar Alegría, ministrja e sportit e Spanjës, ka lëshuar një mesazh “qetësie” përpara ndeshjeve në Madrid dhe tha se do vendosen “më shumë se 2,000 oficerë policie dhe roje civile”.
