Në kuadër të “Muajit të letërsisë”, LSHK-ja MBAJTI NJË TAKIM LETRAR
Anëtarët e LSHK-së, në lokalet e tyre në Prishtinë, mbajtën një takim letrar.
Në fjalën e hapjes, kryetari i LSHK-së, prof. dr. Shyqri Galica, ndër të tjera, theksoi se muaji tetor, „Muaji i letërsisë”, është festa jonë më e gjatë, në të cilën duhen zhvilluar veprimtari dhe duhet kontaktuar kolegët shkrimtarë, të cilët jo vetëm që duhet motivuar njëri-tjetrin për ta sensibilizuar çështjen e krijimtarisë letrare dhe përhapjen e librit, por duhet vepruar edhe në institucionet shkollore dhe universitare për ta nxitur krijimtarinë letrare edhe në ato mjedise.
Pavarësisht zhvillimeve aktuale në fushat e tjera, libri po fiton hapësirë në forma të ndryshme, jo vetëm si botim në letër, por edhe në formë elektronike, duke u bërë pjesë e interesimit anembanë botës dhe e mundësive për ta pasur në duar kushdo që do të ketë dashuri për të. Tashmë shumë biblioteka po pajisen edhe me ekzemplarë elektronikë si mundësi e këmbimit dhe e nevojave për të eksploruar vlera dhe shtigje për ta njohur krijimtarinë e botës dhe letërsinë moderne gjithandej.
Në këtë kontekst, mundësia për t’i përkthyer ata libra dhe botime të ndryshme është rritur mjaft, kështu që kontaktet tona edhe në këtë formë janë me interes të veçantë. Ky takim yni besoj se do të shërbejë për ta zgjeruar veprimtarinë tonë me aktivitete nëpër shkolla dhe mjedise të tjera, por edhe midis nesh, për ta motivuar anëtarësinë tonë dhe të rinjtë që të merren me librin, me leximin e bibliotekën, për ta njohur më mirë jetën e botën.
Ky muaj duhet të jetë simbolik, sepse krijimtaria letrare kërkon angazhim të vazhdueshëm, lexim të pandërprerë dhe krijime sa më të shpeshta e vlera të reja. Prandaj, është koha që të mendojmë edhe rreth botimeve tona, sepse deri tash asnjëherë nuk gjetëm përkrahje të mjaftueshme, pos revistës “Metafora”, edhe atë me mjete simbolike, – ndër të tjera, theksoi kryetari i LSHK-së.
Me punime në poezi e prozë u paraqitën dhjetëra krijues…
