Në Gjilan promovohet libri “Amaneti i brezave mbi supet e Hysen Zhujës”
Në Biblioteken “Fan S. Noli” në Gjilan është promovuar libri “Amaneti i brezave mbi supet e Hysen Zhujës”, i autorit Ibrahim Hyseni, një vepër që tërhoqi interesimin e dashamirëve të librit dhe personaliteteve të jetës kulturore e publike.
Në promovim mori pjesë edhe kryetari i Gjilanit, Alban Hyseni, i cili vlerësoi librin si një kontribut për ndriçimin e një periudhe të rëndësishme historike. Ai u shpreh se figura e Hysen Zhujës mbetet simbol i besës, drejtësisë dhe mbrojtjes së nderit kombëtar.
Poeti dhe botuesi Sabit Rrustemi e cilësoi promovimin si një moment të veçantë në kuadër të aktivitetit kulturor “Shpalime pranë vere”, duke theksuar se libri ka vlera dokumentare, historike dhe letrare, si dhe përbën një befasi të këndshme për Gjilanin dhe Anamoravën.
Redaktorja Kaltrina Berisha tha se libri është i ndërtuar me kujdes dhe tejkalon kufijtë e një rrëfimi të zakonshëm biografik. Ndërkaq, recensentët Nexhat Rexha dhe Zejnullah Zejnullahu folën për vlerat tematike dhe historike të veprës, duke ndalur vëmendjen te ngjarjet dhe personazhet që trajtohen në të.
Autori Ibrahim Hyseni falënderoi të pranishmit dhe tha se kujtimet e përfshira në këtë libër kanë jetuar gjatë brenda tij, derisa vendosi t’i ndajë me lexuesin.
Gjatë promovimit, pjesë të përzgjedhura nga libri u interpretuan nga Romana Hyseni, Arbër Isufi dhe Mbresa Hyseni-Surdulli.
