Pensionohet pas 26 vitesh shërbim zyrtari policor Sinan Zeneli

Pas më shumë se dy dekadash në shërbim të sigurisë dhe rendit publik, pensionohet zyrtari policor Sinan Zeneli, një nga emrat më të njohur të hetimeve në Rajonin e Gjilanit.

Zeneli ishte pjesë e gjeneratës së tretë të Policisë së Kosovës dhe që nga fillimi i karrierës së tij kontribuoi në Hetimet Rajonale të Krimeve të Rënda, duke u bërë një ndër figurat më të respektuara brenda policisë.

I njohur nga kolegët me nofkën “Plaki”, ai ishte ndër udhëheqësit e parë të hetimeve në periudhën e organizimit të gradave policore në Kosovë dhe mbeti aktiv në këtë sektor për më shumë se 26 vite.

Përveç uniformës së policisë, Sinan Zeneli mbante me krenari edhe statusin e veteranit të UÇK-së, duke i shërbyer vendit në periudha të rëndësishme të historisë së Kosovës.

Me pensionimin e tij mbyllet një kapitull i rëndësishëm profesional, por emri dhe kontributi i tij do të mbeten gjatë në kujtesën e kolegëve dhe qytetarëve.

Shëndet, lumturi dhe pension të qetë për “Plakun”