MKRS: Filluan punimet për ndërtimin e stadiumin të qytetit në Suharekë
Ky është një investim madhor prej 11 milionë eurosh, nga Ministria e Kulturës, Rinisë dhe Sportit, që pritet të përfundojë brenda rreth dy vitesh dhe do të ketë kapacitet mbi 6,500 ulëse.
Në ceremoninë e organizuar me këtë rast morën pjesë Kryeministri i Kosovës, Albin Kurti, Ministri i Kulturës, Rinisë dhe Sportit, Hajrulla Çeku, si dhe Kryetari i Komunës së Suharekës, Bali Muharremaj.
Kryeministri Kurti theksoi rëndësinë e këtij investimi për sportin kosovar, duke u shprehur:
“Ky stadium është i kategorisë 2 plus sipas UEFA-s, me mbi 6,500 ulëse, dhe është një lajm i madh për Suharekën e futbollin e Kosovës. Me këtë investim po lajmë një pjesë të borxhit shtetëror ndaj klubit Ballkani, që me sukseset e tij në arenën ndërkombëtare ka ngritur imazhin e shtetit tonë.”
Nga ana e tij, Ministri Çeku potencoi se ky projekt është pjesë e programit të Qeverisë për zhvillimin e infrastrukturës sportive në të gjithë vendin, duke shtuar:
“Tradita sportive e Suharekës dhe rezultatet e jashtëzakonshme të Ballkanit meritojnë këtë investim të madh.”
Stadiumi i ri do të shërbejë si shtëpia moderne e KF Ballkanit, po ashtu krijon kushte të avancuara për të gjitha klubet e qytetit, për të zhvilluar tutje talentin e të rinjve dhe të rejave.
