Mes përçarjeve në LDK, Pireva: Pa unitet nuk ka rimëkëmbje – Haziri figura më serioze për udhëheqje
Në ditët e fundit, deri një ditë para mbajtjes së Kuvendit të Lidhjes Demokratike të Kosovës (LDK), të paralajmëruar nga kryetari aktual Lumir Abdixhiku, në opinion janë intensifikuar debatet, kritikat, kundërkritikat, vlerësimet dhe propozimet lidhur me atë se kush duhet dhe kush mund të jetë drejtuesi më i përshtatshëm i këtij subjekti politik.
Këto zhvillime po ndodhin në një periudhë të ndjeshme për LDK-në, e cila po përballet me pakënaqësi të theksuara brenda strukturave të saj, veçanërisht pas Zgjedhjeve të Parakohshme Nacionale të 28 dhjetorit 2025.
Prof. Avdi Pireva
Në mesin e propozimeve të shumta që po diskutohen publikisht është edhe qëndrimi i profesorit universitar në Universitetin “Kadri Zeka” në Gjilan, Prof. Avdi Pireva. Sipas tij, opsioni më i mirë aktual për udhëheqjen e LDK-së është figura e Lutfi Hazirit, të cilin e vlerëson si figurë unifikuese dhe politikan me përvojë të gjatë në skenën politike të Kosovës.
“Lutfi Haziri përfaqëson një nga figurat më me përvojë dhe më përbashkuese brenda Lidhjes Demokratike të Kosovës, prandaj udhëheqja e tij deri në zgjedhjet e rregullta do të ishte një zgjidhje e arsyeshme”, ka deklaruar Pireva.
Ai ka theksuar se Haziri ka dekada angazhim politik, njohje të thellë të strukturave të partisë dhe se me qasje institucionale ka dëshmuar aftësi për të menaxhuar situata të ndjeshme dhe tranzicione të vështira.
“Në një periudhë kur LDK-ja ka nevojë për qetësi të brendshme, unitet dhe riorganizim serioz, Lutfi Haziri ofron maturi politike, komunikim, qasje përbashkuese e bashkëpunuese dhe mbi të gjitha respektim të procedurave demokratike të partisë”, ka shtuar ai.
Sipas Pirevës, Haziri shihet edhe si urë lidhëse ndërmjet brezave dhe krahëve të ndryshëm brenda LDK-së, çka, sipas tij, është thelbësore për rikthimin e besimit të anëtarësisë dhe elektoratit.
“Udhëheqja e tij deri në zgjedhjet e rregullta do të nënkuptonte krijimin e kushteve të ndershme dhe të qëndrueshme që anëtarët e LDK-së të vendosin lirshëm për të ardhmen e partisë. Pikërisht kjo qasje e përgjegjshme dhe demokratike e bën Lutfi Hazirin një opsion të besueshëm dhe të nevojshëm për këtë fazë kalimtare dhe për një LDK më të fortë”, ka përfunduar Pireva opinionin e tij, të publikuar në rrjete sociale.
