LUTFI HAZIRI: “VITI 2027 – KOHA E RIKTHIMIT TË MADH TË LDK-SË”
Nënkryetari i LDK-së: “Rruga evropiane e Kosovës kalon nëpër zyrat e LDK-së”
Gjilan, 21 Tetor 2026 – Lutfi Haziri, kryetar i Degës së LDK-së në Gjilan dhe njëherësh Nënkryetar i LDK-së në nivel qendror, ka bërë një thirrje për bashkim dhe mirëbesim brenda partisë më të vjetër shqiptare, me sytë nga zgjedhjet e brendshme dhe ato të përgjithshme.
Përmes një statusi të publikuar në rrjetet sociale, Haziri ka theksuar se viti 2027 do të jetë vit i zgjedhjeve të brendshme, të cilat duhet të mbahen me “të gjitha vlerat që i sublimon LDK”.
“LDK ËSHTË SHTËPI E BESËS DHE SHPRESËS”
Duke folur për 37-vjetorin e themelimit, Haziri e ka cilësuar LDK-në si aset kombëtar.
“Ne jemi parti e vlerave të demokracisë, garës së drejtë dhe mirënjohës për të gjithë ata që kontribuan e ndërtuan për 37 vite këtë aset kombëtar. LDK është shtëpi e besimtarëve të saj, është besë e shpresë për Republikën e Kosovës dhe shqiptarët” – shkroi ai.
Sipas Hazirit, misioni i LDK-së mbetet i qartë: “kthimi i besimit dhe bashkimi i shqiptarëve”.
ORIENTIMI EURO-ATLANTIK DHE MARËDHËNIA ME SHBA
Haziri ka ritheksuar edhe boshtin e politikës së jashtme të LDK-së, duke kërkuar unitet rreth kësaj linje.
“Duhet të jemi gjithmonë mirënjohës e falënderues për partnerët tanë, me vendosmërinë për marrëdhënie speciale me SHBA-të, me Evropën si shtëpi e përbashkët dhe NATO-n si aleanca e vetme” – deklaroi ai.
Ai shtoi me vendosmëri:
“Rruga evropiane e Kosovës kalon nëpër zyrat e LDK-së dhe partnerëve të saj.”
THIRRJE PËR GARA TË DREJTË DHE PA DEBATE TË HERSHME
Duke iu referuar zgjedhjeve të brendshme të vitit 2027, Haziri kërkoi që gara të mos nisë para kohe dhe të bazohet në meritë.
