Komuna e Vitisë dhe projekti AQH investojnë në avancimin e shërbimeve shëndetësore në Viti dhe Pozheran
Kryetari i Komunës së Vitisë, Sokol Haliti, së bashku me drejtoreshën e QKMF-së, Vjollca Kadolli-Halili, dhe drejtorin e Shëndetësisë dhe Mirëqenies Sociale, Halil Musliu, kanë nënshkruar Memorandumin e Mirëkuptimit me Projektin e Kujdesit Shëndetësor të Qasshëm dhe Cilësor (AQH), të përfaqësuar nga drejtuesi i ekipit, Nicu Fota.
Ky memorandum është në vazhdën e bashkëpunimit të nisur në vitin 2024, kur Komuna e Vitisë u bë pjesë e fazës së tretë të projektit AQH, i financuar nga Agjencia Zvicerane për Zhvillim dhe Bashkëpunim (SDC), me qëllim avancimin e shërbimeve të kujdesit parësor shëndetësor.
Memorandumi parasheh një investim prej rreth 60 mijë eurosh nga projekti AQH, si dhe bashkëfinancimin nga Komuna e Vitisë për blerjen e një aparati të ultrazërit për QKMF-në në Viti.
Përmes këtij projekti do të furnizohen QKMF-ja në Viti dhe QMF-ja në Pozheran me pajisje moderne mjekësore dhe laboratorike, duke përfshirë monitorë për pacientë, defibrilatorë, koncentratorë të oksigjenit, aparate EKG, pajisje laboratorike dhe inventar tjetër të nevojshëm për përmirësimin e shërbimeve shëndetësore.
Po ashtu, projekti përfshin pajisje për sallat e trajnimeve në Viti dhe Pozheran, si dhe trajnimin e stafit shëndetësor për përdorimin e ultrazërit dhe pajisjeve të tjera moderne.
Qëllimi i këtij investimi është rritja e cilësisë së shërbimeve shëndetësore, përmirësimi i kushteve të punës për personelin shëndetësor dhe ofrimi i shërbimeve më cilësore e më të sigurta për qytetarët e Komunës së Vitisë.
Kryetari Haliti e vlerësoi këtë bashkëpunim si një hap të rëndësishëm drejt modernizimit të shërbimeve shëndetësore dhe përmirësimit të kujdesit për pacientët në të gjitha lokalitetet e komunës.
