Kanadaja drejt Eurovisionit? Kryeministri Mark Carney përfshihet personalisht në iniciativë
Qeveria kanadeze po shqyrton mundësinë që Kanada të marrë pjesë për herë të parë në Eurovision Song Contest, një ide që deri tani dukej e paarritshme. Sipas burimeve qeveritare, Kryeministri Mark Carney është vetë i përfshirë në këtë nismë që synon ta bëjë Kanadanë pjesë të një prej kompeticioneve muzikore më të mëdha në botë.
Kanadaja aktualisht është anëtare afiliate e Unionit Evropian të Transmetimeve (EBU), ashtu si Australia e cila mori pjesë për herë të parë në vitin 2015. Pikërisht ky precedent e bën projektin kanadez të duket më realist, megjithëse zyrtarët e Eurovisionit kanë deklaruar se konkursi mbetet i hapur vetëm për anëtarët e plotë të EBU-së.
Në vitin 2022, kompania Insight Productions nga Toronto kishte tentuar të krijonte “Eurovision Canada”, një version kombëtar të festivalit ku artistët do të përfaqësonin provincat dhe territoret kanadeze. Fituesi do të dërgohej në Evropë, por projekti nuk u realizua për shkak të kostove të larta dhe kompleksitetit të organizimit, sipas Lindsay Cox, drejtoreshës së kompanisë.
Megjithatë, ekspertët theksojnë se ekziston mundësia që Kanadaja të zgjedhë përfaqësuesin e saj pa një garë televizive, pasi rregullat e Eurovisionit e lejojnë këtë. Historiani i festivalit, Dean Vuletic, paralajmëron se pjesëmarrja do të kërkojë shpenzime të konsiderueshme dhe angazhim serioz institucional.
Ndërkohë, Eurovision 2026 që do të mbahet në Vjenë, do të sjellë edhe rikthimin e Bullgarisë, Rumanisë dhe Moldavisë, tri vende që munguan në vitet e fundit. Drejtori i Eurovisionit, Martin Green CBE, deklaroi:
“Është fantastike t’i mirëpresim sërish BNT, TVR dhe TRM në Eurovision. Rikthimi i tyre është dëshmi e fuqisë së qëndrueshme të këtij festivali dhe e unitetit përmes muzikës.”
Nëse Kanadaja arrin të marrë ftesën, Eurovisioni do të bëhej për herë të parë vërtet transatlantik një hap që do të ndryshonte historinë e festivalit pas 70 vitesh./KultPlus.com
