Hyseni pret delegacionin indian: Gjilani i hapur për investime dhe partneritete të reja
Një delegacion biznesesh nga India ka qëndruar në Gjilan, ku ka zhvilluar takime me përfaqësues institucionalë dhe komunitetin e biznesit lokal, me synim shqyrtimin e mundësive për bashkëpunim ekonomik dhe investime të përbashkëta.
Delegacioni u prit nga kryetari i Komunës së Gjilanit, Alban Hyseni, ndërsa në takim morën pjesë edhe deputetja Liza Gashi dhe drejtori për Zhvillim Ekonomik, Haki Huruglica.
Gjatë takimit bilateral dhe sesionit B2B me bizneset vendore, mysafirët nga India u njohën me potencialet ekonomike të Gjilanit, projektet zhvillimore në realizim dhe mundësitë që ofron komuna për investitorët e huaj.
Kryetari Alban Hyseni theksoi se vizita paraqet një mundësi të rëndësishme për promovimin e Gjilanit si një destinacion tërheqës për investime dhe partneritete ndërkombëtare.
“Prezantuam potencialin ekonomik të komunës sonë, mundësitë konkrete për bashkëpunim dhe investimet që po realizohen në Gjilan. Takime të tilla ndihmojnë në krijimin e urave të reja të bashkëpunimit ndërmjet bizneseve lokale dhe partnerëve ndërkombëtarë”, deklaroi Hyseni.
Ai falënderoi delegacionin indian për vizitën dhe interesimin e treguar, si dhe bizneset gjilanase për pjesëmarrjen aktive në këtë aktivitet.
Sipas tij, Gjilani po forcon vazhdimisht praninë e tij në hartën e bashkëpunimit ekonomik ndërkombëtar, duke krijuar mundësi të reja për investime, zhvillim dhe partneritete afatgjata.
