Gjilan: Tërhiqet propozimi për dhënien në shfrytëzim të mbi 75 hektarëve tokë komunale, Murseli: Presioni publik dha rezultat
Është tërhequr nga rendi i ditës i mbledhjes së Kuvendit Komunal të Gjilanit propozim-vendimi për dhënien në shfrytëzim afatgjatë (99 vjet) të mbi 75 hektarëve pronë komunale, çështje e cila ditëve të fundit ka nxitur debat të madh në opinion dhe në rrjetet sociale.
Lajmin për tërheqjen e kësaj pike e ka bërë të ditur asambleisti i LDK-së, Gentrit Murseli, i cili një ditë më parë kishte reaguar publikisht kundër propozimit, duke publikuar edhe dokumentet që ishin planifikuar të shqyrtoheshin në Kuvendin Komunal.
Sipas dokumenteve të publikuara, propozim-vendimi parashihte dhënien në shfrytëzim për 99 vjet të dy parcelave komunale me sipërfaqe prej mbi 75 hektarësh në zonën “Golemi Rid”, me qëllim realizimin e investimeve në bujqësi dhe industri ushqimore. Si shfrytëzues i propozuar ishte kompania “NordKos” SH.P.K., e regjistruar më 24 prill 2026.
Në reagimin e tij fillestar, Murseli e cilësoi këtë si “skandal të madh”, duke pretenduar se prona komunale po planifikohej t’i jepej një kompanie të themeluar vetëm dy muaj më parë dhe duke kërkuar anulimin e menjëhershëm të vendimit. Ai po ashtu pretendoi se nuk ishin respektuar procedurat ligjore dhe transparenca.
Pas njoftimit për tërheqjen e pikës nga rendi i ditës, Murseli reagoi sërish, duke deklaruar se administrata e Kuvendit e kishte njoftuar për këtë vendim.
“Sapo pranuam njoftimin nga administrata e Kuvendit se është tërhequr nga rendi i ditës Propozim-Vendimi për dhënien në shfrytëzim afatgjatë (99 vjet) të mbi 75 hektarëve tokë komunale. Pas reagimit tim publik dje dhe shqetësimit të madh të qytetarëve, u dëshmua se transparenca dhe presioni publik japin rezultat”, ka shkruar Murseli.
Ai më tej e ka cilësuar tërheqjen e pikës si “hap prapa” të kryetarit të Komunës, Alban Hyseni, duke shtuar se “pasuria e qytetarëve nuk negociohet e nuk falet për interesa personale”.
Deri më tani, Komuna e Gjilanit nuk ka bërë publik ndonjë sqarim zyrtar lidhur me arsyet e tërheqjes së kësaj pike nga rendi i ditës.
