Fillon rindërtimi i kadastrit në Gjilan, Rashiti: Shërbimet do të jenë pa pagesë
Në Gjilan ka nisur zbatimi i projektit për rindërtimin e kadastrit, një proces i rëndësishëm që synon përditësimin dhe saktësimin e të dhënave pronësore në disa zona të komunës.
Drejtoresha për Gjeodezi, Kadastër dhe Pronë, Eljesa Rashiti, ka bërë të ditur se projekti përfshin zonat kadastrale Livoç i Epërm, Bresalc, Shillovë dhe Dobërçan, si dhe lagjet Arbëria dhe Dheu i Bardhë.
Sipas saj, rindërtimi i kadastrit është një ndër proceset më të rëndësishme në administrimin e pronës, pasi mundëson rritjen e sigurisë juridike dhe ndërtimin e një sistemi më transparent dhe funksional.
“Përmes këtij projekti synojmë krijimin e një regjistri të besueshëm të pronave, lehtësimin e procedurave administrative dhe adresimin e çështjeve të trashëguara ndër vite”, ka theksuar Rashiti.
Ajo gjithashtu bëri të ditur se të gjitha shërbimet në kuadër të këtij projekti do të jenë pa pagesë për qytetarët.
Në kuadër të këtij procesi, do të mbahen edhe takime informuese me qytetarët sipas këtij orari:
- 1 prill 2026, ora 19:00 – SHFMU “Vatra e Diturisë”, Livoç i Epërm
- 6 prill 2026, ora 19:00 – SHFMU “Nzim Hikmet”, Miresh
- 7 prill 2026, ora 17:00 – SHFMU “Ibrahim Uruqi”, Bresalc
- 7 prill 2026, ora 19:00 – SHFMU “Vuk Karadžić”, Shillovë
- 8 prill 2026, ora 17:00 – Biblioteka “Fan S. Noli”, Arbëria dhe Dheu i Bardhë
Për më shumë informata, qytetarët mund të informohen përmes platformës online kadastra.info.
Drejtoresha Rashiti ka bërë thirrje për bashkëpunim nga qytetarët, duke theksuar se përfshirja e tyre është thelbësore për suksesin e këtij procesi dhe ndërtimin e një sistemi kadastral të saktë për të gjithë.
