Fatmir Shurdhani reagon ashpër ndaj ridestinimit të “Fshatit të Lumtur”: Projekti po largohet nga misioni për të cilin u ndërtua
Një nga zërat më aktivë në mbrojtjen e të drejtave të personave me aftësi të kufizuara në Gjilan, Fatmir Shurdhani, ka reaguar me tone të ashpra pasi Kuvendi Komunal miratoi ndryshimin e destinimit të projektit “Fshati i Lumtur”. Ai e kundërshton këtë vendim, duke vlerësuar se projekti ishte konceptuar për t’u shërbyer personave me aftësi të kufizuara dhe organizatave që i përfaqësojnë ato.
Në reagimin e tij publik, Shurdhani ka paraqitur argumentet pse, sipas tij, ky vendim është i gabuar, ka kërkuar që të mos ndryshohet qëllimi fillestar i projektit dhe ka theksuar se do të vazhdojë të jetë zë i personave me aftësi të kufizuara.
Ja postimi i plotë i Fatmir Shurdhanit:
Në seancën e sotme të Kuvendit Komunal të Gjilanit, pushteti ia doli që t’ia tjetërsojë destinimin “Fshatit të Lumtur”, një projekti të jashtëzakonshëm, i cili, në kushte normale, do t’u bënte zgjidhje të madhe personave me aftësi të kufizuara.
Për informimin e drejtë të publikut, për ta funksionalizuar këtë projekt, në vitin 2021 ka qenë i formuar një Komision multisektorial në kuadër të Drejtorisë për Shëndetësi dhe Mirëqenie Sociale, por i njëjti është pasivizuar me ardhjen në pushtet të Lëvizjes Vetëvendosje.
Fillimisht, ju bëj me dije se projekti nuk ka qenë i dedikuar për Handikos-in, por për organizatat joqeveritare “Liria”, Down Syndrome Kosova – Dega në Gjilan, “Pema”, Shoqatën e të Verbërve, Shoqatën e Shurdhmemecëve dhe një pjesë të sektorit të mirëqenies sociale.
Pra, krejt avokimi im ka qenë në shërbim të këtyre organizatave dhe në asnjë mënyrë për Handikos-in, sepse ne e kemi objektin që i plotëson të gjitha nevojat e personave me aftësi të kufizuara.
Zgjidhje e madhe do të ishte për ta, sepse janë ndërtuar dy konvikte, një qendër e aftësimit profesional për aftësim dhe riaftësim të personave me aftësi të kufizuara dhe kopshti i fëmijëve, i cili do të shërbente si qendër ditore për fëmijët me aftësi të kufizuara.
Por, tashmë asnjë nga këto shërbime nuk do të kryhen aty për këto kategori, sepse “Fshatit të Lumtur” ia tjetërsuan destinimin, duke ia dhënë në menaxhim Këshillit të Bashkësisë Islame në Gjilan.
Përveç tjerash, nuk ka pasur asnjë debat publik me OJQ-të për ridestinimin e projektit.
Zyrtarisht nuk kanë dhënë asnjë informatë se si do të shfrytëzohet ky projekt. Jozyrtarisht, janë dy versione: njëri se do të bëhet një qendër rajonale e Bashkësisë Islame, ku do të përfshihej Anamorava, Lugina dhe Kumanova, ndërsa tjetri se do të shfrytëzohet për shkollën e mesme të Medresesë “Alauddin”. E paradoksi është se donatori, me një investim prej 2.3 milionë dollarësh, e ka orientuar ekskluzivisht projektin për kategoritë që i përmenda më lart.
Për fund, u kërkoj falje qytetarëve për gjuhën e papërshtatshme në një rast gjatë seancës së sotme, e cila u nxit fillimisht nga kryesuesja e Kuvendit e më pas nga disa anëtarë destruktivë të Lëvizjes Vetëvendosje dhe të kabinetit të kryetarit.
Koha do ta dëshmojë se unë kam pasur të drejtë që kam këmbëngulur në vazhdimësi që në asnjë mënyrë të mos preket qëllimi i projektit.
Sa të jem gjallë, do të avokoj me krejt qenien time për personat me aftësi të kufizuara. Do të jem gjithmonë zëri kumbues i tyre. Hiç s’mërzitem nëse pushteteve nuk u bie tamam!
