Delegacioni i UKZ-së përmbyll vizitën zyrtare në ShBA
Rektori i Universitetit Publik “Kadri Zeka” në Gjilan, Prof. Asoc. Dr. Artan Dërmaku, së bashku me Prorektorin për Bashkëpunim Ndërkombëtar dhe Projekte, Prof. Dr. Dukagjin Leka, si dhe anëtaren e Këshillit Drejtues, Prof. Ass. Dr. Shejnaze Gagica, kanë përmbyllur me sukses vizitën zyrtare në Shtetet e Bashkuara të Amerikës, shkruan faqja zyrtare e UKZ-së.
Gjatë qëndrimit në SHBA, delegacioni i UKZ-së ka zhvilluar takime të rëndësishme me përfaqësues të universiteteve amerikane, në kuadër të Konferencës së ATMAE – Asociacionit për Akreditim të Institucioneve të Arsimit të Lartë në fushat e Teknologjisë dhe Biznesit.
Në këtë konferencë ndërkombëtare, Universiteti Publik “Kadri Zeka” dhe Agjencia e Akreditimit e Kosovës ishin dy institucionet e vetme jo vetëm nga Kosova dhe rajoni, por edhe nga mbarë bota jashtë Shteteve të Bashkuara, që morën pjesë për të ndjekur nga afër praktikat më të mira të proceseve të akreditimit universitar.
Menaxhmenti i UKZ-së, në përputhje me politikat e tij zhvillimore, ka paralajmëruar se do të nisë procesin e akreditimit të disa programeve universitare në këtë Agjenci Amerikane të Akreditimit, hap ky që do të rrisë vlerën ndërkombëtare të programeve të universitetit dhe do të forcojë cilësinë akademike në përputhje me standardet e universiteteve amerikane.
Në përfundim të vizitës, Rektori Prof. Asoc. Dr. Artan Dërmaku theksoi se bashkëpunimet dhe njohuritë e fituara nga kjo vizitë do të hapin rrugë të reja për zhvillimin dhe ndërkombëtarizimin e Universitetit “Kadri Zeka”, duke e vendosur atë në një nivel të ri të konkurrencës dhe cilësisë akademike.
