Bordi dhe Menaxhmenti i RTK-së: Vdekja e Milaimit, humbje për të gjithë
Milaim Krasniqi ishte njëri prej gazetarëve më të spikatur të sportit dhe me kontributin e tij ka lënë gjurmë në zhvillimin e Radio Kosovës, ka vlerësuar Bordi dhe Menaxhmenti i RTK-së.
Bordi dhe Menaxhmenti i RTK-së i janë drejtuar familjes Krasniqi përmes një telegram ngushëllimi, duke theksuar se vdekja e gazetarit Milaim Krasniqi është humbje për të gjithë.
“E dashur familje Krasniqi,
Jemi pranë jush në këtë dhimbje të madhe. Ndarja ngaj jeta e Milaimit është humbje jo vetëm për ju, miqtë, kolegët por mbi të gjitha, humbje e madhe për gazetarinë sportive. Ai ishte njëri prej gazetarëve më të spikatur të kësaj fushe dhe me kontributin e tij ka lënë gjurmë në zhvillimin e Radio Kosovës. Të ndjeheni krenar me gjithë çfarë Milaimi ka lënë trashëgimi profesionale e njerëzore. Bordi dhe Menaxhmenti i RTK-së”, është shkruar në reagim.
FFK ngushëllon familjen e gazetarit Milaim Krasniqi
Ikja e hershme nga kjo botë e gazetarit Milaim Krasniqi është një humbje e madhe për familjen, miqtë dhe për gazetarinë sportive, ka vlerësuar Federata e Futbollit e Kosovës.
Federata ka reaguar pas lajmit për vdekjen e gazetarit Krasniqi, duke dërguar telegram ngushëllimi.
“E nderuara Familje Krasniqi!
Të nderuar drejtues dhe anëtarë të SHGSK-së! Me pikëllim të thellë e morëm lajmin për ndarjen nga jeta të më të dashurit tuaj Milaim Krasniqi, ndaj ju lutem më lejoni që në emrin tim, të KE të FFK-së, klubeve, futbollistëve dhe tërë komunitetit të futbollit, të ju shpreh ngushëllimet më të thella dhe më të sinqerta. Milaim Krasniqi i dha shumë gazetarisë sportive e bashkë me të edhe futbollit të Kosovës. Ai ishte zëri kumbues i futbollit kosovar që nga ditët e para të pasluftës nëpërmjet valëve të radios. Ai nisi me radiotransmetime në Radion Kosova e Lirë, për të vazhduar më pas në Radio Rilindja dhe për të vazhduar traditën e transmetimeve në Radio Kosova, aty ku punoi deri në ditët e fundit të jetës së tij. Mili ishte zëri simbol i radiotransmetimeve të futbollit për më shumë se tri dekada. Ishte pjesë e çdo suksesi të klubeve tona, por edhe i Kombëtares së Kosovës. Ai ishte përplot pozitivitet e vizion. Ishte i lindur për të qenë komentator sporti. Mënyra se si e përçonte emocionin e një ndeshje futbolli tek dëgjuesit e radios ishte sa e veçantë, por aq e papërsëritshme. Thjesht ishte mjeshtër i mikrofonit. Ikja e tij e hershme nga kjo botë është një humbje e madhe për familjen, miqtë dhe për gazetarinë sportive. Ai pas vetës la një arkiv të pasur radiotransmetimesh, emisionesh e spektaklesh sportive e argëtuese. Milaimi ishte i gjithanshëm, intelektual e me virytete të larta. Në këto momente të vështira qëndrojmë afër familjes Krasniqi dhe tërë kolegëve e miqve të tij. I lehtë i qoftë dheu i Kosovës! Me pikëllim të madh,
Agim Ademi, president i FFK-së”, ka shkruar FFK.
AGK dhe SPERTK ngushëllojnë familjen e Milaim Krasniqi
Asociacioni i Gazetarëve të Kosovës ka thënë se e ka pranuar me pikëllim të madh lajmin për vdekjen në Francë, të gazetarit të njohur të sportit, Milaim Krasniqi. Përmes një telegrami AGK ka ngushëlluar familjen, kolegët dhe miqtë e të ndjerit Krasniqi. Gjithashtu familjen Krasniqi e ka ngushëlluar edhe Sindikata e Punëtorëve e RTK-së.
“Telegram ngushëllimi me rastin e vdekjes së gazetarit, Milaim Krasniqi
Asociacioni i Gazetarëve të Kosovës – AGK, e ka pranuar me pikëllim të madh lajmin për vdekjen në Francë, të gazetarit të njohur të sportit, Milaim Krasniqi – redaktor përgjegjës i sportit në Radio Kosova.
Krasniqi, 53-vjeçar ishte një prej zërave më të njohur të gazetarisë sportive në vend, dhe për më shumë se dy dekada ka kontribuar në Radio Kosova, duke komentuar mbi 2 mijë ndeshje të futbollit vendor nga ta gjitha stadiumet e Kosovës.
Paraprakisht, punën e gazetarit të sportit e filloi në gazetën “Bujku”, në vitet ’90, ndërsa më vonë punoi në “Radio Rilindja” dhe “Radio Kosova e Lirë”, si dhe në Televizionin “AA”.
Krasniqi gjithashtu ka drejtuar dhjetëra emisione në radio, dhe puna e tij është çmuar nga adhuruesit e sportit.
AGK-ja i shprehë ngushëllimet më të sinqerta familjes Krasniqi, kolegëve të tij në transmetuesin publik dhe miqëve”, ka shkruar AGK.
Ndërkohë Sindikata e Punëtorëve e RTK-së ka theksuar se Krasniqi ishte një njëri i kompletuar si nga ana profesionale po ashtu edhe nga ana njerëzore.
“Letër ngushëllimi
Sindikata e Punëtorëve e RTK-së ka pranuar me pikëllim të thellë, lajmin për ndarjen nga jeta të kolegut tonë gazetar Milaim Krasniqi.
Milaimi, ishte një njëri i kompletuar si nga ana profesionale po ashtu edhe nga ana njerëzore.
RTK dhe gjithë koleget tanë, sonte humben një koleg dhe një profesionist, nga Redaksia e Sportit në RTK-Radio.
Të gjithë kolegëve në RTK. ju shprehim ngushëllime të sinqerta e në veçanti Redaksisë së Sportit në RTK-Radio”, ka shkruar Sindikata e Punëtorëve e RTK-së.
KOK: Milaim Krasniqi ishte zë i sportit të Kosovës
Komiteti Olimpik i Kosovës ka thënë se Milaim Krasniqi ishe zë i sportit të Kosovës, veçanërisht futbollit, ku dha kontribut të çmuar para dhe pas luftës.
KOK ka dërguar një telegram ngushëllimi me rastin e ndarjes nga jeta të gazetarit Krasniqi.
“Telegram ngushëllimi për ndarjen nga jeta të gazetarit dhe komentatorit të mirënjohur, Milaim Krasniqi
E nderuara, familja Krasniqi
Me dhimbje të thellë morëm lajmin për ndarjen nga jeta të doajenit të gazetarisë sportive, njëherit komentatorit të mirënjohur të radios, Milaim Krasniqi.
Milaimi ishe zë I sportit të Kosovës, veçanërisht futbollit, ku dha kontribut të çmuar para dhe pas luftës.
Një kohë ishte edhe kryetar i Shoqatës së Gazetarëve Sportivë, kurse si gazetar e komentator punoi në Radio Kosovë.
Ikja e tij në amshim, do të lë boshllëk të madh në gazetarinë sportive dhe sportin tonë në përgjithësi, të cilin e deshi dhe e promovoi deri në kaplimin e sëmundjes së rëndë.
Në emër të Komitetit Olimpik të Kosovës dhe lëvizjes olimpike në vend, i shpreh ngushëllimet më të thella familjes së tij, miqve, kolegëve të gazetarisë sportive dhe kolegëve të Radio Kosovës.
Me respekt,
Ismet Krasniqi
President i Komitetit Olimpik të Kosovës”, ka shkruar KOK.
