Ardita Sinani i referohet raportit të DASh-it, vë theksin te pasivizimi i adresave të shqiptarëve në Luginë të Preshevës
Duke iu referuar raportit të Departamentit Amerikan të Shtetit, Ardita Sinani,Këshilltare Politike e Kryeministrit të Republikës së Kosovës për Preshevë, Medvegjë dhe Bujanoc, shkruan Tv Gjilani.
Ajo vë theksin tek pjesa që i referohet të drejtave të shqiptarëve në Luginë të Preshevës, e që nënvizon se nuk ka pasur ndryshime të rëndësishme sa i përket të drejtave të njeriut në Serbi gjatë vitit 2023.
“Raporti i fundit i Departamentit Amerikan të Shtetit për të Drejtat Njeriut thekson se shqiptarët e Luginës, përballen me pengesa të mëdha dhe dhunë sistematike, duke përfshirë procesin e pasivizimit të adresave të shqiptarëve në Luginë Preshevë dhe nevojën për implementimin e “Planit 7 Pikërish””.
“Diskriminimi në punë, mungesa e aksesit në shërbime themelore dhe marginalizimi social janë vetëm disa nga sfidat e përshkruara në raport”, ka shtuar ajo.
Postimi i plote:
Raporti i fundit i Departamentit Amerikan të Shtetit për të Drejtat Njeriut thekson se shqiptarët e Luginës, përballen me pengesa të mëdha dhe dhunë sistematike, duke përfshirë procesin e pasivizimit të adresave të shqiptarëve në Luginë Preshevë dhe nevojën për implementimin e “Planit 7 Pikërish”. Diskriminimi në punë, mungesa e aksesit në shërbime themelore dhe marginalizimi social janë vetëm disa nga sfidat e përshkruara në raport.
Në një shoqëri ku barazia dhe drejtësia duhet të jenë parimet themelore, është e papranueshme që disa komunitete të ndjehen të izoluara dhe të përjetojnë diskriminim për shkak të prejardhjes së tyre etnike. Duke ecur përtej konstatimeve, duhet të ndërmerren hapa të rëndësishëm për të adresuar këto shqetësime. Zbatimi i plotë dhe efektiv i ligjeve ekzistuese që mbrojnë të drejtat e minoriteteve dhe luftojnë diskriminimin është thelbësor.
Në të njëjtën kohë, duhet të rritet ndërgjegjësimi dhe trajnimi i punonjësve të sektorit publik lidhur me respektimin e diversitetit dhe parandalimin e diskriminimit. Përmirësimi i aksesit të minoriteteve në arsim, shëndetësi dhe punësim është poashtu jetik për të siguruar që të gjithë qytetarët të kenë mundësinë e barabartë për të përfituar nga këto shërbime dhe për të zhvilluar potencialin e tyre.
Në fund, një thirrje drejtpërdrejt Serbisë për përfshirjen e komuniteteve minoritare në proceset vendimmarrëse dhe hartimin e politikave publike që adresojnë nevojat e tyre specifike është thelbësore për të ndërtuar një shoqëri më të drejtë dhe më të barabartë për të gjithë.
