Ardita Sinani reagon për regjistrimin e padisë në Gjykatën Evropiane për të Drejtat e Njeriut
Kryetarja e Komunës së Preshevës, Ardita Sinani, ka reaguar përmes një postimi në Facebook pas regjistrimit të padisë në Gjykata Evropiane për të Drejtat e Njeriut lidhur me çështjen e pasivizimit të adresave.
Sinani e ka cilësuar këtë zhvillim si një hap të rëndësishëm drejt vendosjes së drejtësisë, duke theksuar se bëhet fjalë për një çështje që tejkalon dimensionin individual dhe prek shumë familje.
Sipas saj, padia synon t’i japë fund një praktike sistematike që cenon të drejtat themelore të qytetarëve.
Kryetarja e Preshevës ka shprehur mirënjohje të veçantë për znj. Teuta Fazliu për guximin qytetar dhe gatishmërinë për ta përfaqësuar këtë çështje në instancat ndërkombëtare.
Po ashtu, ajo ka falënderuar avokatin Drini Grazhdani për profesionalizmin dhe përkushtimin në ndërtimin juridik të këtij rasti kompleks.
Regjistrimi i padisë në gjykatën ndërkombëtare konsiderohet si një zhvillim me rëndësi për trajtimin e çështjes së pasivizimit të adresave, një problematikë që prej vitesh është ngritur si shqetësim nga përfaqësues politikë dhe qytetarë në Luginën e Preshevës.
