Arbër Ismajli: Gjilani ka nevojë për punë të organizuar dhe vendimmarrje të drejtë

I nominuar nga dega e LDK-së për kryetar të Gjilanit, Arbër Ismajli, ka intensifikuar aktivitetin e tij në rrjete sociale me komente e opinione si dhe prezantime të ndryshme nga aktivitetet që zhvillon në këtë fazë.

Ai ka shkruajtur së fundi se Gjilani ka nevojë për punë të organizuar dhe vendimmarrje të drejtë.

“Çdo vendbanim, urban e rural, meriton trajtim të barabartë dhe shërbime funksionale. Zgjidhjet kërkojnë përkushtim dhe bashkëpunim të sinqertë me qytetarët. Vetëm përmes dialogut dhe punës së përbashkët mund të ndërtojmë një qytet që ëndërrojmë”, ka nënvizuar Ismajli.

“Qyteti ynë meriton qeverisje të përgjegjshme dhe transparente. Për punën e qeverisjes me popullin e për popullin, me prioritete të qarta dhe të ndara. Bashkë do ta ndërtojmë Gjilanin, me përkushtim, përgjegjësi dhe besim të fortë”, ka përfunduar ai në faqen e tij duke vënë ne fokus gatishmërinë për aktivitete të përbashkëta me qytetarë në funksion të një qeverisje paszgjedhore, pas zgjedhjeve të paralajmëruara më 12 tetor 2025.