Adi Krasta hyn në “Ferma VIP” me një mision të veçantë, për herë të parë pjesë e një reality show
Moderatori i njohur nuk u fut si konkurrent, por për të realizuar një intervistë me një nga fermerët brenda spektaklit
Moderatori dhe gazetari i njohur shqiptar, Adi Krasta, është bërë pjesë e spektaklit televiziv Ferma VIP, duke shënuar kështu herën e parë që ai merr pjesë në një format reality.
Megjithatë, Krasta nuk ka hyrë në fermë si konkurrent apo fermer, por në rolin e tij të gazetarit dhe moderatorit, me misionin për të zhvilluar një intervistë me një nga banorët e spektaklit. Prania e tij ngjalli interes të madh te publiku, duke pasur parasysh se ai njihet për karrierën e gjatë në televizion dhe për qëndrimin e tij kritik ndaj formateve të ndryshme mediatike.
Duke folur për eksperiencën e tij në këtë format, Krasta tha se spektakli ka kaluar nëpër sfida dhe përballje të forta, ndërsa vlerësoi interesimin e madh që ka ngjallur te publiku.
“Vetë spektakli i madh ka kaluar disa ballafaqime të forta. Kohë do e tregojë nëse duhet të kthehemi te spektakli i dikurshëm. Unë i kam misionet e vogla. Intervista, pyetja, trajtimi i një teme të rëndësishme. Jam i kënaqur aty ku jam. Në një reality vij për herë të parë”, u shpreh ai.
Krasta shtoi se nuk është ndjekës i rregullt i reality show-ve, por fenomeni i “Ferma VIP” ka qenë mjaft i përfolur për të tërhequr vëmendjen e tij.
“Unë kam një mënyrë kapriçoze të mënyrës si ndjek televizor. Nuk shikoj për orë të tëra, por fenomeni që ka ngacmuar gjykimin popullor ka qenë shumë i madh. Sa herë bëjmë programe, emri vjen gjithmonë, për shkak se është spektakolare”, deklaroi ai.
Gjatë qëndrimit në spektakël, Krasta nuk i kurseu as batutat dhe komentet e tij për opinionistët e emisionit, përfshirë Armina Mevlani, Ermal Mamaqi dhe Einxhel Shkira, duke sjellë një atmosferë të veçantë në program.
Pjesëmarrja e Adi Krastës në “Ferma VIP” u konsiderua si një nga surprizat më të mëdha të spektaklit, duke zgjuar kureshtjen e publikut për rolin dhe intervistën që ai do të zhvillojë brenda fermës.
