Ndahet nga jeta veterani i arsimit në Gjilan, Raif Rexhepi
Komuniteti arsimor i Gjilanit ka humbur një nga mësimdhënësit e tij, veteranin e arsimit Raif Rexhepi, i cili u nda nga jeta më 2 nëntor 2026.
Për disa dekada me radhë, Rexhepi i kushtoi jetën profesionit të mësuesit, duke kontribuar në edukimin dhe arsimimin e shumë gjeneratave të nxënësve në Gjilan. Ai do të kujtohet për përkushtimin në punë, urtësinë, humanizmin dhe raportin e veçantë që ndërtoi me nxënësit dhe kolegët e tij.
Përveç kontributit në arsim, Raif Rexhepi ishte i njohur edhe për humanizmin e tij. Ai ishte dhurues i rregullt i gjakut dhe, gjatë jetës, kishte dhuruar gjak më shumë se 100 herë, duke u bërë shembull i solidaritetit dhe ndihmës për të tjerët.
Ndarja e tij nga jeta lë pas kujtimin e një pedagogu që profesionin e mësuesit e pa si mision dhe që kontributin e tij e la të shënuar në jetën e shumë njerëzve.
Ngushëllime familjes Rexhepi, miqve, kolegëve dhe të gjithë atyre që e njohën dhe bashkëpunuan me të!
