Protesta në Tiranë shoqërohet me dhunë, sulmohen institucione, biznese dhe prona
Protesta e nisur që prej orës 11:00 të paradites në Tiranë është shoqëruar me përshkallëzim të tensioneve, akte dhune dhe dëmtime të shumta materiale. Protestuesit kanë shkaktuar dëme përgjatë aksit kryesor që lidh qendrën e kryeqytetit me Bulevardin “Dëshmorët e Kombit”. Ata goditën dhe thyen kamera sigurie, semaforë dhe tabela reklamash përgjatë rrugës që lidh qendrën e Tiranës me Kryeministrinë.
Lëvizja e turmës ka përfshirë goditjen e një sërë godinash të institucioneve dhe ambienteve private. Veç Ministrisë së Arsimit dhe bizneseve në Rrugën e Durrësit, sulmeve nuk u ka shpëtuar as Piramida e Tiranës dhe institucionet qendrore.
Pjesëmarrësit në protestë sulmuan me radhë të gjitha institucionet shtetërore duke nisur nga Ministria e Brendshme, Ministria e Ekonomisë dhe Inovacionit si dhe ndaj Bankës së Shqipërisë. Dhunës së protestuesve nuk i ka shpëtuar as Piramida në kryeqytet. Ata kanë thyer xhamat dhe sulmuar bizneset në brendësi.
Gjatë përpjekjeve për të sulmuar godinën e Kryeministrisë me lëndë piroteknike dhe shishe me lëndë djegëse, forcat e rendit kanë ndërhyrë për të mbrojtur perimetrin e sigurisë dhe për të shpërndarë turmën me përdorimin e gazit lotsjellës dhe ujit me presion.
(16:22) Protesta e studentëve në Tiranë, tensione para Ministrisë së Arsimit
Vijon protesta para Ministrisë së Arsimit në Tiranë, e cila është shoqëruar me tensione, pasi një grup protestuesish të maskuar kanë shkulur kangjellat që ndajnë rrugën nga trotuari dhe kanë hedhur molotovë, gurë dhe lëndë plasëse në drejtim të godinës së institucionit. Në katin e parë dhe të dytë të godinës janë hedhur edhe mjete piroteknike duke i vënë flakën ambienteve.
Përballë situatës së krijuar, Policia ka ndërhyrë duke përdorur ujë me autobotë dhe gaz lotsjellës, në përpjekje për të shpërndarë protestuesit.
Marshimi nisi para orës 14:00, pasi studentë të Fakultetit të Ekonomisë, Universitetit Politeknik dhe Fakultetit të Mjekësisë bojkotuan mësimin për t’iu bashkuar protestës, por edhe disa shkolla në kryeqytet.
Policia ka hedhur vazhdimisht ujë për të shpërndarë turmën dhe për të mos i lejuar të dëmtojnë objektet. Nga ana tjetër protestuesit iu kanë vënë flakën kazanëve dhe kanë shkulur pllakat e trotuareve duke i hedhur drejt institucioneve dhe policisë.
Situata e sotme vjen një ditë pas protestës së zhvilluar më 13 tetor, e cila u shoqërua me akte dhune, përplasje mes protestuesve dhe forcave të rendit, dëmtime materiale dhe persona të lënduar.
Protesta nisi para Ministrisë së Arsimit, ku protestuesit shkulën kangjellat e trotuarit dhe dëmtuan një prej portave të oborrit, duke mundësuar hyrjen e një grupi brenda hapësirës së brendshme të godinës.
Më tej, persona të maskuar hodhën kapsolla, gurë, vezë, molotovë dhe pllaka trotuari në drejtim të godinës dhe efektivëve të policisë, duke thyer disa nga xhamat e fasadës.
Për të zmbrapsur sulmin dhe për të rivendosur rendin, Policia e Shtetit ndërhyri përmes përdorimit të sprajit me piper, gazit lotsjellës dhe ujit me autobotë që ndodheshin në gatishmëri.
16 persona u arrestuan, ndërsa 49 të tjerë janë proceduar. Gjashtë persona mbetën të lënduar dhe po marrin mjekimin e duhur në Spitalin Universitar të Traumës. Sipas përditësimit të Ministrisë së Shëndetësisë, tre prej tyre janë kalimtarë, ndërsa tre të tjerët janë protestues. Po ashtu, të lënduar kanë mbetur edhe 6 efektivë./RTK
