Sebi Ismajli: 27 vite qëndrueshmëri, shembulli i krenarisë dhe dinjitetit në Gjilan

12 September 2026 0 Comment 13 min read

“Forca nuk është të mos rrëzohesh kurrë, por të gjesh guximin të ngrihesh”

GJILAN – Sot, më 5 shtator 2026, mbushen 27 vite nga dita që ndryshoi rrjedhën e jetës së Sebi Ismajlit nga Gjilani. Më 5 shtator 1999, pas një aksidenti të rëndë, gjithçka për të mori një drejtim tjetër.

Por ajo që nuk ndryshoi kurrë ishte shpirti, vullneti dhe karakteri i saj i pathyeshëm.

Postimi i Sebit: “Një ditë që më ndryshoi trupin, por nuk ma theu shpirtin”

Me rastin e 27-vjetorit, Sebi ka ndarë në rrjetet sociale një rrëfim të sinqertë për rrugëtimin e saj.

“5 shtatori i vitit 1999 ishte dita që më ndau jetën në dy pjesë: jetën para aksidentit dhe jetën pas tij. Një ditë që më ndryshoi trupin, por nuk ma theu shpirtin.”

Ajo flet hapur për 27 vitet me dhimbje, operacione, rehabilitime dhe beteja të panumërta.

“Ka pasur ditë kur jam ndier e lodhur, ditë kur kam pyetur veten ‘pse mua?’, por gjithmonë, në një mënyrë apo tjetër, kam gjetur forcën për të vazhduar.”

Në vend të hidhërimit, Sebi ka zgjedhur mirënjohjen. Në foto e shohim të buzëqeshur, në një skuter lëvizje buzë liqenit, me dy paterica të vendosura pas saj – një simbol i fuqishëm i lirisë që ajo e ka fituar me punë dhe durim.

“Më mësoi të vlerësoj një ditë të zakonshme. Të gëzohem për gjërat e vogla. Të dalloj njerëzit që më duan me të vërtetë. Dhe mbi të gjitha, mësoi se forca nuk është të mos rrëzohesh kurrë, por të gjesh guximin të ngrihesh sa herë që jeta të rrëzon.”

Mesazhin më prekës ia drejton vetes së 27 viteve më parë:

“Mos ki frikë… do të jetë e vështirë, shumë e vështirë, por ti do t’ia dalësh. Do të qash, do të lodhesh, do të zhgënjehesh, por do të vazhdosh. Dhe një ditë do të shikosh pas dhe do të kuptosh sa e fortë ke qenë.”

Vlerësimi nga kolegët në Drejtorinë e Administratës Publike.

Sebi sot është pjesë e Drejtorisë së Administratës Publike të Komunës së Gjilanit, ku punon me përkushtim të plotë.

Drejtoria e Administratës e ka nderuar si shembull. Sipas kolegëve, Sebi është dëshmi e gjallë e qëndrueshmërisë dhe profesionalizmit.

“Sebi është shembulli më i mirë i krenarisë, dinjitetit dhe mirësisë së pashembullt në Gjilan. Përkundër fatkeqësisë që e përballoi para plot 27 vitesh, ajo vjen çdo ditë në punë me buzëqeshje, me përgjegjësi dhe me një zemër që frymëzon të gjithë ne. Jemi krenarë që e kemi pjesë të familjes sonë.”

Shembulli i Gjilanit

27 vite më vonë, Sebi Ismajli vazhdon të jetë një zë i fuqishëm i qëndrueshmërisë. Historia e saj nuk është histori e humbjes, por histori e fitores mbi vështirësitë.

“27 vite më vonë… jam këtu. Me plagët e mia, me historinë time, me kujtimet e mia dhe me një zemër plot mirënjohje. Faleminderit vetes… që nuk u dorëzova.”