Ndahet nga jeta gazetari dhe ish-aktori i njohur gjilanas, Nexhmedin Ymeri
Është ndarë nga jeta gazetari dhe ish-aktori i njohur nga Gjilani, Nexhmedin Ymeri, duke lënë pas një trashëgimi të çmuar në gazetari, teatër dhe jetën kulturore të qytetit.
I lindur më 24 mars 1949 në Gjilan, Nexhmedin Ymeri ishte një nga emrat më të njohur të gazetarisë lokale. Karrierën e nisi qysh në moshë të re me shkrime të botuara në “Rilindja” dhe “Zëri i Rinisë”, ndërsa në pranverën e vitit 1974 iu bashkua Radio Gjilanit, vetëm pak muaj pas themelimit të saj. Me përkushtimin dhe profesionalizmin e tij, ai u bë një nga figurat më të rëndësishme të këtij institucioni mediatik, duke shërbyer edhe si redaktor përgjegjës.
Gjatë karrierës së tij shumëvjeçare punoi edhe në media të tjera, si Radio Energji, TV Vali dhe TV Men, si dhe bashkëpunoi me gazeta, revista dhe mediume të ndryshme në Kosovë. Ai mbeti gjithmonë besnik profesionit të gazetarit, edhe në periudhat më të vështira, duke e ushtruar këtë mision me përkushtim, guxim dhe përgjegjësi profesionale.
Përveç gazetarisë, Nexhmedin Ymeri dha një kontribut të rëndësishëm edhe në Teatrin e Gjilanit, ku interpretoi në dhjetëra role gjatë viteve dhe më pas shërbeu edhe si menaxher i teatrit. Për angazhimin dhe kontributin e tij shumëvjeçar në artin skenik, në vitin 2014 u nderua me Çmimin e Karrierës për Vepër Jetësore.
Gjatë jetës së tij ai u vlerësua me një sërë mirënjohjesh dhe çmimesh, ndërsa kujtohet si një njeri që jetoi me pasion për gazetarinë dhe teatrin, duke lënë gjurmë të pashlyeshme në historinë mediatike dhe kulturore të Gjilanit.
Ndarja e tij nga jeta është një humbje e madhe për familjen, kolegët, komunitetin e gazetarëve dhe botën e artit. Emri dhe vepra e Nexhmedin Ymerit do të mbeten pjesë e kujtesës dhe historisë së gazetarisë dhe teatrit në Gjilan.
