Shpëtoi familjen, më pas u kthye mes rrënojave: Rrëfimi prekës i turkut që thotë se nxori 38 persona nga gërmadhat në Venezuelë
Kur dy tërmete të fuqishme me magnitudë 7.2 dhe 7.5 goditën Venezuelën me vetëm 39 sekonda diferencë, İbrahim Eser ndodhej në zyrën e tij në qytetin La Guaira. Prej 22 vitesh ai jeton në këtë vend, por atë ditë përjetoi çastet më të vështira të jetës.
“Isha ulur në zyrë kur papritur pashë frigoriferin dhe dollapët duke u rrëzuar drejt meje. Mendimi im i parë ishte për bashkëshorten dhe fëmijët, sepse shtëpia jonë ndodhej menjëherë pas një prej ndërtesave që u shemb“, kujton ai.
Pa humbur kohë, Eser vrapoi drejt shtëpisë. Gjatë rrugës, skenat që pa i përshkruan si të pabesueshme.
“Teksa po vrapoja, pashë divane, televizorë, por edhe njerëz që binin nga ndërtesat. Ishte një pamje që nuk do ta harroj kurrë“, rrëfen ai.
Pasi siguroi që familja e tij ishte jashtë rrezikut, ai nuk u largua nga zona. Përkundrazi, u kthye menjëherë drejt ndërtesave të shembura.
“Kur u ktheva, pashë se kjo ndërtesë dhe ajo ngjitur ishin shembur plotësisht. Nga të gjitha anët dëgjoheshin britma. Të plagosurit ishin shtrirë në rrugë, ndërsa të tjerë kishin mbetur nën rrënoja. Fillova t’i nxirrja me duart e mia“, tregon ai.
Sipas dëshmisë së tij, gjatë asaj nate ai arriti të shpëtonte 38 persona, duke i nxjerrë nga rrënojat dhe duke i dërguar në vende të sigurta.
Mes momenteve më të dhimbshme, Eser kujton përpjekjen për të shpëtuar një burrë me emrin Santiago.
“Për më shumë se një orë dëgjoja zërin e tij nën rrënoja, por pa makineri të rënda ishte e pamundur të depërtonim përmes betonit dhe kolonave të shembura. Nuk arritëm ta shpëtonim me kohë“, thotë ai.
Në fund, ai thekson se pamjet që pa nuk mund të krahasohen me ato që shihen në televizion.
“Është krejt ndryshe ta shohësh shkatërrimin në televizor dhe krejt ndryshe ta përjetosh nga afër. Vetëm kur ndodhesh aty e kupton përmasën e vërtetë të tragjedisë“, përfundon Eser.
