Gjilan: 70,000 euro për OJQ-të që kujdesen për shëndetin dhe mirëqenien e qytetarëve
Drejtoria e Shëndetësisë dhe Mirëqenies Sociale në Komunën e Gjilanit ka përmbyllur me sukses thirrjen publike për subvencionimin e projekteve në fushën e shëndetësisë dhe mirëqenies sociale.
Pas përfundimit të procedurave, janë nënshkruar kontratat me 14 organizata joqeveritare përfituese.
Thirrja kishte për qëllim mbështetjen financiare të programeve që kontribuojnë në përmirësimin e shëndetit dhe mirëqenies sociale të qytetarëve. Projektet përfshijnë ofrimin e shërbimeve sociale, promovimin e shëndetit, mbështetjen e grupeve në nevojë, fuqizimin e përfshirjes sociale dhe zhvillimin e iniciativave me interes publik.
Përmes kësaj skeme janë ndarë gjithsej 70,000 euro, krahasuar me 20,000 euro sa ishte buxheti në fillim të mandatit aktual qeverisës.
“Duke pasur parasysh këto fakte, kjo rritje e konsiderueshme dëshmon përkushtimin e Komunës së Gjilanit dhe të Drejtorisë së Shëndetësisë dhe Mirëqenies Sociale për të investuar në projekte që sjellin ndikim të drejtpërdrejtë në jetën e qytetarëve”, thuhet në njoftim.
Drejtoria uron të gjitha organizatat përfituese për sukses dhe shpreh besimin se projektet do të realizohen me përgjegjësi, transparencë dhe rezultate konkrete në shërbim të qytetarëve të Komunës së Gjilanit.
Synimi, sipas drejtorisë, është forcimi i partneritetit ndërmjet institucioneve publike dhe shoqërisë civile për t’iu përgjigjur sa më mirë nevojave të komunitetit.
