Tragjedi në Suharekë: Rrufeja i merr jetën një të riu 26-vjeçar në zonën malore
Një ngjarje tragjike ka ndodhur pasditen e së mërkurës në territorin e Komunës së Suharekës, ku një i ri 26-vjeçar ka humbur jetën pasi dyshohet se është goditur nga rrufeja.
Sipas informacioneve të para, rasti ka ndodhur në afërsi të vendit të njohur si “Guri i Dellocit”, në zonën malore mes bjeshkëve të Bukoshit dhe Dellocit.
Lajmi është konfirmuar nga zëdhënësi i Policisë për rajonin e Prizrenit, toger Shaqir Bytyqi, i cili bëri të ditur se menjëherë pas njoftimit, njësitet policore dhe hetuesit kanë dalë në vendin e ngjarjes. Për shkak të terrenit të vështirë malor, ekipet janë përballur me vështirësi për të arritur deri te viktima.
Ekipi i Emergjencës së Suharekës, pasi ka mbërritur në vendngjarje, ka konstatuar vdekjen e të riut me inicialet F.B., rreth 26 vjeç.
Për rastin është njoftuar Prokurori kujdestar, ndërsa hetuesit rajonalë, në bashkëpunim me Prokurorin e Shtetit, kanë nisur hetimet për të sqaruar plotësisht rrethanat e kësaj ngjarjeje të rëndë.
