Kryesuesja e Kuvendit Komunal të Gjilanit reagon pas tensioneve në seancë: Nuk do të zmbrapsem nga ushtrimi i detyrës
Pas zhvillimeve dhe përplasjeve në seancën e sotme të Kuvendit Komunal, Krenare Latifi Kqiku ka reaguar përmes një postimi publik, duke dënuar sjelljet që, sipas saj, cenuan punën institucionale dhe ushtruan presion ndaj saj.
Pas tensioneve që shoqëruan seancën e sotme të Kuvendit Komunal të Gjilanit dhe përplasjeve ndërmjet pozitës dhe opozitës, ka reaguar edhe kryesuesja e Kuvendit Komunal, Krenare Latifi Kqiku.
Përmes një postimi në Facebook, ajo ka deklaruar se ngjarjet e ndodhura gjatë seancës përbëjnë një cenim të dinjitetit institucional dhe të funksionimit demokratik të Kuvendit. Latifi Kqiku ka akuzuar disa asamblistë të PDK-së për presion fizik dhe psikologjik ndaj saj, duke theksuar se nuk do të tërhiqet nga ushtrimi i detyrës së saj dhe se Kuvendi duhet të mbetet vend i debatit dhe argumentit.
Ja postimi i plotë i Krenare Latifi Kqikut:
Të nderuar qytetarë të Gjilanit,
Seanca e sotme e Kuvendit Komunal ishte një nga momentet më të rënda për demokracinë tonë lokale dhe dinjitetin institucional. Ajo që ndodhi sot nuk ishte debat politik, por një tentativë e pastër, primitive dhe e dështuar për frikësim, shantazh dhe bllokim të punës institucionale.
Sjellja e asamblistëve të PDK-së, përkatësisht e Riad Rashitit, ushtrues detyre i kryetarit të Degës së PDK-së në Gjilan, Bujar Nevzadit, shef i grupit të asamblistëve, dhe Burhan Isufit, asamblist, të cilët rrethuan tavolinën time të punës duke ushtruar presion të papranueshëm fizik dhe psikologjik, nuk përfaqëson qytetarinë e Gjilanit.
Kur deklarova në seancë se “pesë burra po më rrinë mbi kokë”, nuk e thashë nga frika, por për të shpërfaqur publikisht mendësinë e tyre patriarkale dhe arrogante. Asnjë burrë, asnjë grup dhe asnjë subjekt politik nuk mund të më thyejë apo të më imponohet në ushtrimin e detyrës sime legjitime.
Dua t’i siguroj të gjithë qytetarët se asnjë lloj presioni nuk do të më zmbrapsë as edhe një milimetër nga ushtrimi i detyrës sime kushtetuese dhe ligjore. Uzurpimi i institucionit dhe bllokimi i proceseve nga ana e PDK-së nuk do të tolerohen në asnjë formë dhe nga askush. Kuvendi është vendi i argumenteve dhe i qytetarisë, jo i forcës fizike, i muskujve apo i sjelljeve kërcënuese që i takojnë së kaluarës.
Në fund, dua t’ju falënderoj nga zemra të gjithëve që më keni shkruar dhe më keni ofruar mbështetje të jashtëzakonshme sot, pas atyre pamjeve të shëmtuara që u panë në media. Mesazhet tuaja janë forca ime. Kuvendi Komunal u takon qytetarëve, jo atyre që dëshirojnë ta marrin peng atë përmes tensioneve. Unë do të vazhdoj të udhëheq me dinjitet të plotë, integritet të lartë dhe respekt absolut për ligjin!
