Kushtrim Kadriu: Qytetarët kanë votuar për Bulevardin dhe Parkun, reagimet për prerjen e lisave janë të çuditshme

Këshilltari komunal i Partisë “Vatra” në Kuvendin Komunal të Gjilanit, Kushtrim Kadriu, ka reaguar lidhur me debatet e fundit për prerjen e lisave në kuadër të projektit të Bulevardit dhe Parkut të qytetit.

Ai ka bërë të ditur se shumë qytetarë i kanë kërkuar qëndrimin e tij për këtë çështje, ndërsa ka theksuar se projekti i Bulevardit dhe Parkut ka qenë pjesë e programit qeverisës të kryetarit Alban Hyseni dhe se qytetarët e kanë mbështetur atë në zgjedhje.

Sipas Kadriut, është normale që gjatë realizimit të projekteve të mëdha infrastrukturore të ketë prerje të disa drunjve, prishje të rrugëve dhe ndërhyrje të tjera, pasi qendra e qytetit shndërrohet përkohësisht në kantier ndërtimi.

Në fund të reagimit të tij, ai ka kritikuar kundërshtarët politikë, duke thënë se para se të kandidojnë për kryetar komune duhet të jenë në gjendje të lexojnë e të shkruajnë shqip, të flasin para qytetarëve dhe të prezantojnë projekte konkrete për zhvillimin e qytetit.

Ja postimi i plotë:

“Shumë qytetarë më kanë kërkuar mendimin tim për parkun, si në komente ashtu edhe në biseda private. Ky është qëndrimi im:

Mos reagoni kot. Qytetarët kanë votuar për Bulevardin dhe Parkun.

Qytetarët e kanë votuar Alban Hysenin me mijëra vota, ndërsa ai ka prezantuar vazhdimisht sheshin dhe parkun si pjesë të programit të tij qeverisës. Prandaj, reagimet e sotme për prerjen e lisave më duken disi të çuditshme.

Nuk ka kaluar shumë kohë që qytetarët e rizgjodhën me një numër rekord votash. Gjatë gjithë fushatës ai ka prezantuar projektin e Bulevardit, një projekt i madh që në mënyrë të pashmangshme e shndërron qendrën e qytetit në kantier ndërtimi për një periudhë të caktuar.

Është krejt normale që gjatë realizimit të projekteve të tilla të ketë prerje të disa drunjve, prishje të rrugëve dhe ndërhyrje të tjera infrastrukturore.

Ndërsa ju që sot po reagoni, kur të nxirrni kundërkandidatë për kryetar komune, fillimisht sigurohuni që të dinë të lexojnë e të shkruajnë shqip, të jenë në gjendje të flasin para qytetarëve dhe të prezantojnë projekte konkrete për zhvillimin e qytetit.”