Ekspozita “Gratë në rrugën e lirisë” nderon kontributin e grave në luftën e UÇK-së
Në kuadër të aktiviteteve për shënimin e Ditës së Çlirimit të Kamenicës, është hapur ekspozita “Gratë në rrugën e lirisë”, e cila sjell në vëmendje kontributin e grave në luftën e Ushtrisë Çlirimtare të Kosovës.
Ekspozita përmbledh fotografi dhe materiale kushtuar grave që ishin pjesë e UÇK-së, duke pasqyruar rolin dhe sakrificën e tyre gjatë luftës për lirinë e Kosovës.
Organizimi i saj është bërë nga ish-pjesëtare të UÇK-së nga zona të ndryshme operative. Organizatore e ekspozitës është Bukurije Rexhepaj-Dukaj, ndërsa ideatore janë Mirvete Hasani, Demrije Salijaj, Florije Osmani dhe Linda Fetahu-Krivanjeva.
Gjatë ceremonisë, Linda Fetahu-Krivanjeva foli për procesin e grumbullimit të materialeve, duke theksuar se ekspozita synon të dokumentojë dhe të ruajë kujtesën për kontributin e grave gjatë luftës çlirimtare.
Kryetari i Komunës së Kamenicës, Kadri Rahimaj, tha se mbështetja e aktiviteteve që ruajnë kujtesën historike mbetet me rëndësi për institucionet dhe shoqërinë, ndërsa e cilësoi ekspozitën si një dëshmi të vlerave që duhet të përcillen te brezat e rinj.
Ish-pjesëtarja e UÇK-së dhe organizatorja Bukurije Rexhepaj-Dukaj ndau kujtime nga periudha e luftës dhe falënderoi të gjithë ata që kontribuuan në realizimin e ekspozitës.
Ndërkaq, kryetari i OVL-UÇK-së, Dega në Kamenicë, Milaim Limoni, foli për rolin e grave gjatë viteve 1998–1999, duke vlerësuar kontributin e tyre në rezistencë dhe në mbështetjen e popullatës gjatë luftës.
Në përfundim të ceremonisë u ndanë mirënjohje për organizatorët dhe ish-pjesëtaret e UÇK-së, në shenjë vlerësimi për kontributin e tyre në luftën për lirinë e Kosovës.
