Mësimdhënësja Zuhrije Rifati pensionohet pas një karriere të gjatë në arsim
GJILAN, 17 qershor – Pas shumë vitesh të përkushtimit në edukimin dhe arsimimin e brezave të tërë, mësimdhënësja Zuhrije Rifati është përcjellë në pension me një ceremoni mirënjohjeje të organizuar nga kolektivi i ShFMU “Thimi Mitko” në Gjilan.
Në shenjë vlerësimi për kontributin e saj shumëvjeçar, kolektivi i shkollës i ndau zonjës Rifati një mirënjohje, duke falënderuar punën, përkushtimin dhe angazhimin e saj në shërbim të arsimit.
Me këtë rast, ushtruesja e detyrës së drejtoreshës së shkollës, Lumturije Jakupi, i uroi pensionim të mbarë, duke vlerësuar lart rrugëtimin e saj profesional.
“Faleminderit për përkushtimin, sakrificën dhe kontributin e çmuar në arsim, veçanërisht në vitet e vështira të ’90-ta. Shëndet dhe lumturi në këtë kapitull të ri të jetës!”, thuhet në mesazhin e saj.
Në pllakatën e ndarë me këtë rast theksohet se mirënjohja i është dhënë mësimdhënëses Zuhrije Rifati për kontributin shumëvjeçar në edukimin dhe arsimimin e shumë brezave, me urimin që pensionimi të jetë një periudhë e mbushur me kënaqësi, shëndet dhe gëzime.
Ceremonia u zhvillua në një atmosferë mirënjohjeje dhe emocionesh, ku kolegët e falënderuan për bashkëpunimin ndër vite dhe i uruan shëndet, lumturi dhe ditë të qeta në pension.
