“Lavdi Komandantit e Heroit, Abdullah Tahiri” – Ahmet Isufi nderon dëshmorët në Gjilan
Gjilan, 19 maj 2026 – Me familjarë të dëshmorëve, invalidë, veteranë të UÇK-së, të burgosur politikë, përfaqësues institucionalë dhe qytetarë, u bënë homazhe në nderim të Heroit dhe Komandantit të lavdishëm Abdullah Tahiri, si dhe të dëshmorëve Ibrahim Pacolli e Arben Ramadani.
Pjesëmarrësit vendosën buqeta lulesh për të kujtuar veprimtarinë e tyre patriotike e luftarake.
Në një postim në rrjete sociale, Ahmet Isufi, Komandant i Zonës Operative të Karadakut, shkroi:
“Heroi i Kombit, Abdullah Tahiri, në çdo etapë të proceseve për liri e pavarësi, ishte në ballë të tyre duke shfaqur bindjet e tij publikisht, por edhe duke u angazhuar praktikisht në themelimin e celulave të para të UÇK-së në Zonën Operative të Karadakut.”
Sipas Isufit, “Komandant Dulla ishte shembulli më i veçantë se si ideja kthehet në praktikë e realizimi i idealit arrihet kur fjalën e bën vepër. Tërë angazhimi e përkushtimi i tij mund të përkufizohet si luftë jetësore për lirinë e atdheut.”
Ai kujtoi edhe bashkëluftëtarët që ranë në beteja me stemën e UÇK-së:
“Rrugës së tij të lirisë, u rreshtuan bashkëluftëtarët që ranë në beteja me stemën e UÇK-së, Ibrahim Pacolli e Arben Ramadani që sot i kujtojmë me pietet për luftën e tyre të lavdishme.”
Postimi mbyllet me fjalët: “Lavdi Komandantit e Heroit, Abdullah Tahiri! Lavdi Dëshmorëve të Kombit, Ibrahim Pacolli e Arben Ramadani!”
