Komuna e Vitisë mirëpriti debatin “Fuqia në partneritet: Nga Dialogu në Veprim”
Komuna e Vitisë mirëpriti organizimin e debatit mbi politika me temën “Fuqia në partneritet: Nga Dialogu në Veprim”, i organizuar nga National Democratic Institute (NDI) me mbështetjen e Agjencisë Zvicerane për Zhvillim dhe Bashkëpunim (SDC), në kuadër të aktiviteteve të “Javës së Gruas 2026”.
Në fjalën hyrëse, kryetari i Komunës së Vitisë, Sokol Haliti, theksoi rëndësinë e bashkëpunimit ndërinstitucional dhe fuqizimit të rolit të grave në proceset vendimmarrëse në nivel lokal. Ai vuri në pah se përfshirja aktive e grave në jetën institucionale dhe publike është thelbësore për zhvillimin demokratik dhe të qëndrueshëm të komunës.
Ndërkaq, Nancy Soderberg vlerësoi përkushtimin e Komunës së Vitisë në avancimin e pjesëmarrjes së grave në jetën publike dhe institucionale. Ajo theksoi se partneriteti ndërmjet institucioneve dhe komunitetit mbetet çelësi për ndërtimin e politikave që reflektojnë nevojat reale të qytetarëve.
Ky debat mblodhi përfaqësues të institucioneve lokale dhe qendrore, si dhe akterë të tjerë relevantë, duke krijuar një hapësirë të rëndësishme diskutimi mbi qeverisjen gjithëpërfshirëse, fuqizimin e rolit të gruas dhe avancimin e shërbimeve në nivel komunal.
Avancimi i dialogut dhe ndërtimi i politikave më të përgjegjshme, transparente dhe më afër nevojave të qytetarëve mbeten elemente kyçe për një qeverisje demokratike dhe zhvillim të qëndrueshëm lokal.
Komuna e Vitisë mbetet e përkushtuar në mbështetjen e iniciativave që promovojnë barazinë, përfshirjen qytetare dhe forcimin e demokracisë lokale.
