Universiteti “Kadri Zeka” sjell robotin humanoid Unitree G1, hap laboratorin ndër më inovativët në Kosovë
Universiteti “Kadri Zeka” në Gjilan ka inauguruar një laborator të ri teknologjik në kuadër të Fakultetit të Shkencave Kompjuterike, i cili po konsiderohet ndër më inovativët në Kosovë dhe rajon.
Lajmin e ka bërë të ditur profesori i angazhuar në këtë universitet, Buen Bajrami, i cili tha se ky investim është realizuar nën udhëheqjen dhe mbështetjen e rektorit të universitetit, Prof. Asoc. Dr. Artan Dermaku.
Sipas tij, laboratori i ri është pajisur me teknologji moderne dhe mjete të avancuara për mësim dhe kërkim shkencor, përfshirë robotin humanoid edukativ “Unitree G1”, që konsiderohet një nga robotët më të avancuar në botë në fushën e edukimit dhe inteligjencës artificiale.
Përveç robotit humanoid, laboratori përmban edhe printerë 3D me kapacitet të lartë, pajisje PLC, Arduino, Raspberry Pi, sisteme Smart Home, pajisje elektronike dhe vegla të avancuara pune për zhvillimin e projekteve teknologjike.
Nga universiteti theksojnë se ky laborator do t’u krijojë studentëve mundësi më të mëdha për punë praktike, zhvillim profesional dhe hulumtime në fushat më moderne të teknologjisë, robotikës dhe inteligjencës artificiale.
Ky investim vlerësohet si një hap i rëndësishëm drejt modernizimit të arsimit universitar dhe përgatitjes së studentëve për tregun bashkëkohor të teknologjisë.
