“Europiania e Vitit 2026”, BE-ja zgjedh Shqipe Neziri Velën për kontributin e saj të jashtëzakonshëm
Zyra e Bashkimit Europian në Kosovë ka shpallur Shqipe Neziri Velën “Europiania e Vitit 2026”, duke vlerësuar angazhimin dhe kontributin e saj në promovimin e barazisë gjinore, fuqizimin e grave dhe zhvillimin e qeverisjes së qëndrueshme në sektorin e energjisë, si në Kosovë ashtu edhe më gjerë.
Sipas Zyrës së BE-së në Kosovë, Neziri Vela ka mbi 20 vjet përvojë profesionale në sektorin e energjisë, qeverisjes së mirë dhe luftës kundër korrupsionit.
Në njoftim thuhet se ajo, si bashkëthemeluese e organizatës “Gratë në Energji dhe Miniera”, ka ndihmuar në mentorimin dhe trajnimin e qindra studenteve dhe profesionisteve të reja, duke mbështetur zhvillimin e tyre profesional dhe krijimin e një gjenerate të re të grave lidere në sektorë tradicionalisht të dominuar nga burrat.
“Puna e saj ka kontribuar edhe në transformimin e sektorit të energjisë në Kosovë, në përputhje me standardet dhe praktikat e Bashkimit Europian”, thuhet në njoftimin e Zyrës së BE-së.
Zyra e BE-së bëri të ditur se Shqipe Neziri Vela ishte njëra nga katër të nominuarit nga publiku i Kosovës për këtë çmim. Në mesin e të nominuarve ishin edhe Avni Mustafa, drejtor i Roma Versitas Kosova, Dejan Radivojeviq, drejtor i Forumit për Zhvillim dhe Bashkëpunim Multi-Etnik, si dhe Rozafa Basha, prorektore për Ndërkombëtarizim dhe Shkëmbim Akademik në Universitetin e Prishtinës.
Paneli vlerësues për përzgjedhjen e fituesit përbëhej nga përfaqësues të organizatave të shoqërisë civile dhe të prezencës së Bashkimit Europian në Kosovë.
