Në UKZ u mbajt vizita e ekipit të Ekspertëve për riakreditimin e programit master “E Drejta Penale”
Në Universitetin Publik “Kadri Zeka” në Gjilan u zhvillua vizita e Ekipit të Ekspertëve në kuadër të procedurës së riakreditimit të programit të studimit ‘E Drejta Penale”, LLM (60 ECTS), i integruar në Fakultetin Juridik.
Vizita u realizua nga ekipi i ekspertëve i përbërë nga Anca Monica Ardeleanu, si dhe ekspertët ndërkombëtarë Salvatore Randazzo dhe Jekaterina Bortkevic, të cilët morën pjesë online. Procesi u koordinua nga përfaqësuesja e Këshillit të Kosovës për Akreditim, Lenda Hyseni.
Gjatë vizitës u zhvilluan takime të shumta me menaxhmentin e Fakultetit Juridik, përfaqësues të sigurimit të cilësisë dhe stafit administrativ, bartës të programit, staf akademik, studentë, të diplomuar si dhe me përfaqësues të institucioneve dhe partnerëve relevantë nga fusha e drejtësisë dhe tregu i punës.
Po ashtu, ekipi i ekspertëve pati mundësinë të vizitojë edhe infrastrukturën universitare, përfshirë bibliotekën, amfiteatrin, laboratorët, hapësirat mësimore dhe zyrat administrative.
Dekanja e Fakultetit Juridik, Prof. Assoc. Dr. Fatmire Krasniqi, duke falënderuar të gjithë pjesëmarrësit për bashkëpunimin dhe angazhimin e tyre gjatë këtij procesi vlerësues, theksoi rëndësinë e kësaj procedure, duke thënë se riakreditimit është mundësi e rëndësishme për vlerësimin dhe avancimin e cilësisë së programit, gjithnjë duke reflektuar përkushtimin e Fakultetit Juridik për standarde të larta akademike dhe përgatitje profesionale të studentëve.
