Cikloni niset drejt nesh, të martën intensifikohen reshjet e shiut, në male borë deri në 30 cm. Temperaturat zbresin deri në -2°C
Gjatë kësaj jave, vendi ynë do të mbetet nën ndikimin e kushteve të paqëndrueshme atmosferike dhe të masave të ftohta ajrore, veçanërisht në fillim të javës.
Drejt fundit të javës vërehen tendenca për përmirësim të motit dhe ngritje të temperaturave maksimale.
Nën këto kushte, dita e hënë u karakterizua me mot kryesisht të vranët dhe reshje lokale shiu, kryesisht në sasi të pakta, të cilat sonte gjatë natës pritet të intensifikohen.
Një ciklon, i cili u formua të dielën në Detin Tirren, në pjesën qendrore të Detit Mesdhe, tashmë po lëviz drejt vendit tonë. Si rrjedhojë, të martën do të mbajë mot i vranët dhe me reshje të shpeshta shiu, të cilat lokalisht do të jenë në formë rrebeshe. Në zonat malore priten reshje të dendura bore, me shtresë prej 20–30 cm në majat e larta të perëndimit të vendit.
Të mërkurën do të vijojë mot kryesisht i vranët, me mundësi për reshje të izoluara shiu në disa zona.
Dita e enjte parashikohet me vranësira dhe intervale kthjellimesh gjatë ditës, ku nuk përjashtohet mundësia për ndonjë reshje të izoluar shiu.
Të premten pritet mot me diell dhe vranësira në orët e mëngjesit, të cilat do të tërhiqen gradualisht gjatë ditës. Temperaturat do të fillojnë të shënojnë ngritje në vlerat maksimale.
Edhe fundjava parashikohet kryesisht me diell, ndërsa mëngjeset do të jenë mjaft të ftohta, me temperatura që pritet të zbresin edhe në vlera negative. Megjithatë, të dielën pasdite dhe në mbrëmje pritet shtim gradual i vranësirave.
Era do të fryjë nga drejtime të ndryshme, ndërsa të martën lokalisht pritet të jetë e fortë, me shpejtësi prej 10 deri në 40 km/h.
Temperaturat minimale do të lëvizin prej -2 deri në 8°C, ndërsa ato maksimale prej 6 deri në 14°C. /MeteoKosova/
