Reporterët pa Kufij: Kosova shënon ngritje në lirinë e medias në raportin 2026
Kosova ka përmirësuar ndjeshëm pozicionin e saj në lirinë e medias gjatë vitit të fundit, sipas raportit të ri të Reporterëve pa Kufij (RSF) për vitin 2026.
Në Indeksin Botëror të Lirisë së Shtypit, Kosova renditet në vendin e 84-të, duke u ngjitur për 15 pozita krahasuar me vitin 2025. RSF thekson se, ndonëse mbetet ndër vendet me renditje më të ulët në Evropë, Kosova është ndër të paktat në Ballkanin Perëndimor që ka shënuar përmirësim, ndërkohë që rajoni në përgjithësi po përballet me rënie të lirisë së medias.
Raporti rikujton se një vit më parë Kosova kishte pësuar rënie të theksuar, duke u renditur në vendin e 99-të nga 180 shtete.
Sipas RSF, mediat në Kosovë vazhdojnë të luajnë rol në mbajtjen e politikanëve përgjegjës, por gazetarët përballen ende me presione dhe sulme politike. Po ashtu, përmendet edhe sfida me rregullatorin e medias, Komisionin e Pavarur të Medias (KPM), si dhe vendimet e kontestuara ligjore që kanë prekur sektorin, të cilat janë vlerësuar si jokushtetuese nga Gjykata Kushtetuese.
Raporti thekson gjithashtu tensionet politike ndaj mediave para zgjedhjeve të vitit 2025, përfshirë bojkotimin e disa mediave private nga qeveria dhe rreziqet ndaj pavarësisë së transmetuesit publik RTK. Përmenden edhe ankesat e mediave në gjuhën serbe për diskriminim në qasje në informacion, që sipas tyre cenon të drejtat kushtetuese të komuniteteve.
Në aspektin financiar, mediat në Kosovë kryesisht mbështeten nga reklamat e sektorit privat, por në disa raste edhe nga autoritete lokale apo ndikime politike, ndërsa disa media, veçanërisht ato në gjuhën serbe, varen edhe nga financime jashtë vendit dhe nga donacione ndërkombëtare.
Në nivel global, RSF vëren se Evropa Lindore dhe Azia Qendrore mbeten ndër rajonet me performancën më të dobët, ndërsa BE-ja dhe Ballkani Perëndimor, pavarësisht rënieve në disa shtete, vazhdojnë të renditen më lart në indeksin e lirisë së shtypit.
