Fillimi i javës me mot tipik vjeshtor: reshje intensive dhe temperatura të ulëta, çfarë sjell fundjava?
Në fillim të kësaj jave vendi ynë do të mbetet nën ndikimin e masave të ftohta dhe të lagështa ajrore, më pas pritet një zbehje e tyre.
Nën këto kushte, dita e hënë do të karakterizohet me diell dhe vranësira. Në pjesën e parë të ditës mund të ketë reshje të izoluara, ndërsa më pas pritet shtim i vranësirave dhe lokalisht reshje shiu, herë pas here në formë rrebeshi, të shoqëruara me shkarkesa rrufesh.
Të martën kemi një mot tipik vjeshtor, i cili do të jetë i vranët dhe herë pas here me reshje shiu në të gjithë vendin, të cilat lokalisht do të jenë intensive, të shoqëruara me ndonjë shkarkesë elektrike.
Të mërkurën parashikohet mot kryesisht i vranët dhe lokalisht me reshje të izoluara shiu. Temperaturat do të mbeten të ulëta, rreth 10°C.
Të enjten pritet mot me diell dhe vranësira. Në orët e mëngjesit, varësisht nga kthjellimet në zona të caktuara, mund të regjistrohen edhe vlera negative.
Dita e premte dhe fundjava parashikohen me diell dhe vranësira, por mund të ketë reshje të izoluara gjatë fundjavës. Temperaturat do të rriten ndjeshëm, veçanërisht të dielën.
Era do të fryjë kryesisht nga drejtimi i veriut, e cila herë pas here pritet të jetë mjaft e fuqishme në fillim të javës, me shpejtësi prej 15-51 km/h.
