Prishtina pret Dukagjinin në ndeshjen përmbyllëse të xhiros së 28-të në Superligë
Sot (e hënë) zhvillohet ndeshja e fundit në kuadër të xhiros së 28-të në Superligën e Kosovës.
Prishtina do të jetë nikoqire e Dukagjinit, në një përballje që pritet të jetë mjaft interesante, duke pasur parasysh objektivat e ndryshëm të dy skuadrave.
“Bardhëkaltërit” synojnë vendin e tretë në tabelë, andaj fitorja është jetike për ta. Në anën tjetër, Dukagjini kërkon pikë të rëndësishme për t’u larguar nga zona e rrezikshme.
Ndeshja do të zhvillohet në stadiumin “Fadil Vokrri”, me fillim nga ora 15:00.
Aktualisht, Prishtina renditet në vendin e katërt me 42 pikë, ndërsa Dukagjini mban pozitën e gjashtë me 34 pikë, dy më shumë se Ferizaj që ndodhet në zonën e rrezikut.
