Driton Rexhepi, kryetar i KK Bujanoc: “Nuk ka ndryshim në qarkullim në Breznicë dhe Dobrosinë, kërkesë Kurtit për lehtësim”
Kryetari i Kuvendit Komunal të Bujanocit, Driton Rexhepi, ka njoftuar se nuk ka asnjë ndryshim në regjimin e qarkullimit në pikat kufitare Breznicë dhe Dobrosinë.
Sipas tij, pas një bisede telefonike me zyrtarë të Qeverisë së Kosovës, është konfirmuar se qarkullimi në këto pika do të vazhdojë normalisht, pa pengesa për qytetarët.
Megjithatë, Rexhepi ka ngritur shqetësimet e banorëve të zonës kufitare lidhur me vështirësitë në lëvizje, duke i dërguar një kërkesë zyrtare Kryeministrit të Kosovës, Albin Kurti.
Në këtë kërkesë, ai thekson se pritjet e gjata dhe ngarkesa e shtuar në pikën kufitare Dheu i Bardhë po shkaktojnë pengesa serioze në jetën e përditshme të qytetarëve.
Rexhepi kërkon që të shqyrtohet mundësia për hapjen apo funksionalizimin më të plotë të pikave kufitare në Breznicë dhe Dobrosin, si një zgjidhje praktike për lehtësimin e qarkullimit dhe reduktimin e ngarkesës në pikat ekzistuese.
Ai gjithashtu apelon që institucionet e Kosovës të kenë në konsideratë ndikimin e këtyre masave tek shqiptarët e Komunës së Bujanocit, të cilët përballen drejtpërdrejt me pasojat e tyre.
Rexhepi shpreh shpresën se kjo çështje do të trajtohet me mirëkuptim dhe se do të gjendet një zgjidhje e favorshme për qytetarët e zonës kufitare.
