IKD dorëzon raportet e monitorimit te Kryetari i Gjykatës Themelore në Gjilan
Gjilan, 13 mars 2026 – Drejtuesit e Institutit të Kosovës për Drejtësi (IKD), Ehat Miftaraj, Betim Musliu dhe Gëzim Shala, kanë zhvilluar të premten një takim me Kryetarin e Gjykatës Themelore në Gjilan, Venhar Salihu.
Gjatë këtij takimi, përfaqësuesit e IKD-së dorëzuan raportet e monitorimit dhe hulumtimit sistematik lidhur me funksionimin e sistemit të drejtësisë në vend, si dhe diskutuan për zbatimin e rekomandimeve të dala nga këto raporte.
Kryetari i Gjykatës Themelore në Gjilan, Venhar Salihu, vlerësoi punën e IKD-së në monitorimin dhe hulumtimin e sistemit të drejtësisë, duke theksuar rëndësinë e bashkëpunimit me shoqërinë civile për rritjen e transparencës dhe forcimin e sundimit të ligjit.
Nga IKD bëhet e ditur se instituti vazhdimisht avokon pranë akterëve të sistemit të drejtësisë dhe sigurisë përmes dërgimit të raporteve me gjetje, vlerësime dhe rekomandime konkrete, si dhe përmes takimeve me zyrtarë të institucioneve përkatëse.
Sipas IKD-së, qëllimi i këtij angazhimi është avancimi i politikave që rrisin efikasitetin dhe efektivitetin e sistemit të drejtësisë dhe sigurisë, si dhe përmirësimi i qasjes së qytetarëve në drejtësi.
