Probleme teknike në seancën e Kuvendit Komunal në Gjilan, reagon Burhan Isufi (PDK)
Seanca e sotme e Kuvendit Komunal është përballur me mungesë të kushteve elementare për zhvillimin normal të punimeve, ka reaguar Burhan Isufi, anëtar i Kuvendit Komunal nga radhët e Partia Demokratike e Kosovës (PDK).
Sipas Isufit, në sallë nuk ka funksionuar sistemi i zërimit, duke e bërë të pamundur ndjekjen e diskutimeve nga të pranishmit, ndërsa edhe transmetimi i seancës është shoqëruar me probleme të vazhdueshme teknike.
“Sot, në seancën e Kuvendit Komunal, po përballemi me mungesë të kushteve elementare për mbajtjen e një seance normale dhe dinjitoze. Nuk funksionon zërimi brenda sallës, çka e bën të pamundur ndjekjen e diskutimeve siç duhet, ndërsa edhe transmetimi po has në probleme të vazhdueshme”, thuhet në reagimin e Isufit.
Ai e cilësoi situatën si të papranueshme, duke theksuar se seancat e Kuvendit duhet të zhvillohen me standarde të larta teknike dhe me transparencë të plotë për qytetarët.
“Kur mungojnë kushtet bazë, dëmtohet puna institucionale dhe besimi publik. Kërkojmë që urgjentisht të krijohen kushtet e nevojshme për zhvillimin normal të seancës dhe për garantimin e transparencës ndaj qytetarëve”, ka deklaruar Isufi.
