Gjilan: U nda nga jeta Prof. Ibrahim Shabani (1932 – 2025)
Dedikim nga Xhevdet Kalaba:
Profesor, intelektual dhe veprimtar i çështjes kombëtare.
(Ceremonia Mortore: sot më 23 dhjetor 2025 – ora 14 ( me iqindi – Varrimi;) – Mbledhje komemorative në sallën e Shkollës së Muzikën të Gjilanit – nesër (24 dhjetor 2025) nga ora 11:00.
Me dhimbje të thellë njoftojmë ndarjen nga jeta të Prof. Ibrahim Shabanit, një personalitet i shquar i arsimit dhe kulturës shqiptare, i cili la gjurmë të pashlyeshme në zemrat dhe mendjet e brezave.
Familja Shabani mbeti pa prindin dhe kujdestarin e devotshëm, por kujtesës dhe arkivit të Gjilanit dhe Anamoravës ia skaliti emrin e një personaliteti – model të qytetarisë dhe atdhedashurisë – atë të Prof. Ibrahim Shabanit.
I lindur më 1932 në fshatin Përlepnicë të komunës së Gjilanit, në një familje të njohur për përkushtimin ndaj dijes dhe atdhedashurisë, Prof. Shabani që në moshë të re ndoqi rrugën e dijes me vendosmërisë dhe përkushtim të jashtëzakonshëm.
Pas përfundimit të shkollës fillore në vendlindje dhe gjimnazit në Prizren, ai kreu studimet e larta në Fakultetin Filologjik të Beogradit në Degën e Albanologjisë.
Jeta e tij nuk ishte pa sfida, por një vendim i drejtorisë së arsimit, që i mundësoi të vazhdojë shkollimin, i ndryshoi fatin duke e shpërblyer me një jetë plot suksese dhe kontribute të vyera.
Që nga viti 1953 filloi punën si mësues i gjuhës shqipe, duke dhënë mësim në disa shkolla të rajonit të Gjilanit dhe më pas si drejtor i Bibliotekës së qytetit, ku shërbeu si një shtyllë e rëndësishme kulturore.
Në vitet 1963 – 1969 dha mësim në shkollën normale “Skënderbeu” në Gjilan, duke nxjerrë gjashtë gjenerata maturantësh, që më vonë u bënë tulla ndërtimi të shtetësisë së Kosovës.
Si drejtues i Bibliotekës Amë, ai e bëri atë një qendër kulturore me rëndësi të veçantë, duke siguruar lidhje të vazhdueshme me botimet nga Kosova dhe Shqipëria dhe duke organizuar panaire libri që ngjallën pasion për leximin në qytet.
Ai ishte ndër themeluesit e Teatrit Gjysmëprofesionist të Gjilanit dhe një zë i guximshëm që mbrojti me përkushtim arsimin dhe kulturën shqipe.
I përjashtuar nga puna në vitet e fundit të jetës së tij profesionale për qëndrimet e tij të sinqerta dhe të palëkundura, Prof. Shabani nuk humbi asnjëherë besimin në idealet e tij dhe mbeti një model i integritetit, guximit qytetar dhe dashurisë për atdheun.
Ai do të kujtohet nga brezat si mësuesi i ndershëm, intelektuali i përkushtuar dhe njeriu që nuk bëri kompromis me parimet e tij, si dhe si një udhëheqës kulturor i cili punoi pa u lodhur për të ruajtur dhe zhvilluar trashëgiminë kombëtare.
Profesor Ibrahim Shabani la pas vete dy vajza e tre djem si dhe nipa a mbesa, për të cilët shpreh ngushëllime të pafundme.
Lamtumirë, Prof. Ibrahim Shabani! Kujtimet dhe veprat tuaja do të mbeten një dritë e pashuar për të gjithë ne.
Dedikim nga: Xhevdet Kallaba
