Haxhiu fajëson opozitën për buxhetin e RTK-së
Nënkryetarja e Kuvendit të Kosovës, Albulan Haxhiu ka fajësuar opozitën për çështjen e buxhetit për RTK-në, punëtorët e secilës pagën e tyre që nuk e morën tash e 17 ditë po e kërkojnë përmes protestave dhe grevës që e nisën këtë të hënë.
Haxhiu ka thënë se Qeveria e Kosovës e pati bërë zgjidhjen për RTK-në edhe kur nuk kishte Kuvend, e që edhe tash mund të bëhet meqenëse ka Kuvend, por që gjithë kjo sipas saj opozita po vazhdon të bëjë politikë.
“Qeveria e Kosovës ka bërë zgjidhje për pagat e punëtorëve të RTK-së sa nuk kishte Kuvend të konstituuar duke ndarë një huadhënie për ta. Mirëpo tash që kemi Kuvend të konstituuar nuk ka sens të vazhdohet me huadhënie të tjera, zgjidhje të përkohshme, kur krejt çfarë duhet për financimin e plotë dhe të qëndrueshëm të këtij institucioni dhe punëtorëve të tij është që grupet politike të mblidhen e t’i formojnë komisionet parlamentare. Nuk është në rregull që opozita të vazhdojë e të bëjë politikë me këtë çështje kur e di saktë edhe ajo që kjo është e vetmja mënyrë përpara për RTK dhe punëtorët e saj”, shkroi Haxhiu.
