UKZ pjesëmarrëse e Konferencës Ndërkombëtare STEM-PD 2025 mbajtur në Stamboll
Në Universitetin Ibn Haldun në Stamboll të Turqisë, u mbajt Konferenca Ndërkombëtare STEM-PD 2025, e cila bashkoi në një program unik Konferencën e 6-të Ndërkombëtare për Arsimin STEM dhe Konferencën e 6-të të Shkencës.
Synimi i konferencës ishte tё krijoj një platformë të përbashkët shkëmbimi akademik mes studiuesve, akademikëve dhe profesionistëve të arsimit nga Evropa dhe më gjerë.
Në mesin e tyre ishte edhe Universiteti Publik “Kadri Zeka” në Gjilan, i përfaqësuar nga delegacioni i përbërë nga Prof. Dr. Xhevdet Thaqi Dekan i Fakultetit tё Shkencave Aplikative njëherësh drejtues i Qendrës sё Exelencёs Profesionale STEM, si dhe Valon Kllokoqi, Drejtor i Departamentit për Buxhet dhe Financa nё UKZ.
Në ditën e parë të punimeve, Prof. Dr. Xhevdet Thaqi udhëhoqi panelin me temë “Innovative Frameworks and Methodologies in STEM Teaching”, ku u paraqitën tre prezantime kërkimore. Nё vazhdim tё sesionit ai prezantoi hulumtimin me titull: “Different Approaches to STEM Education: Interconnected vs. Parallel Fields”, ku u trajtuan dy qasje thelbësore të arsimit STEM, qasja e ndërthurur (Interconnected STEM), që synon integrimin e disiplinave shkencore përmes problemeve reale, duke nxitur kreativitetin, bashkëpunimin dhe mendimin kritik, si dhe qasja paralele (Parallel STEM) që fokusohet në ruajtjen e thellësisë konceptuale brenda çdo disipline, por shpesh rrezikon fragmentizimin e dijes.
Prof. Dr. Xhevdet Thaqi theksoi se: “Vetëm përmes integrimit sistematik të disiplinave STEM, sfidat komplekse të botës moderne mund të zgjidhen në mënyrë kuptimplote”.
Ai vuri në pah rëndësinë e bashkërendimit midis shkencës, teknologjisë, inxhinierisë dhe matematikës në ndërtimin e një ekosistemi të qëndrueshëm arsimor dhe inovativ.
Në këtë konferencë, u prezantuan studime dhe hulumtime lidhur me rolin e inteligjencës artificiale (AI), realitetit virtual dhe të shtuar (AR/VR) në krijimin e formave të reja të integrimit STEM, si dhe nevoja për bashkë-hartim të kurrikulave dhe zhvillim profesional të mësimdhënësve përmes modelit RME (Realistic Mathematics Education) dhe metodave eksperimentale të mbështetura nga teknologjia.
Pjesëmarrësit e konferencës u pajtuan që çdo shpikje apo përmirësim shkencor nuk është vetëm sukses akademik, por edhe një investim ekonomik që ndikon drejtpërdrejt në mirëqenien e shoqërisë.
Në një ekonomi gjithnjë e më digjitale, aftësitë STEM janë çelësi për konkurrueshmëri, qoftë në industrinë e teknologjisë, energjisë së gjelbër apo inteligjencës artificiale, tё cilat po formësojnë ekonominë e së ardhmes.
Konferenca STEM-PD 2025 shërbeu si një urë e rëndësishme bashkëpunimi ndërmjet institucioneve të arsimit të lartë, qendrave të ekselencës dhe rrjeteve ndërkombëtare si CoVE STEM Europe dhe EU STEM Coalition, në të cilat UKZ ka rol aktiv.
Pjesëmarrja dhe prezantimi i Universitetit Publik “Kadri Zeka” në këtë ngjarje të rëndësishme ndërkombëtare dëshmon përkushtimin e tij ndaj zhvillimit të arsimit inovativ STEM dhe afirmon rolin e universitetit si qendër e ekselencës dhe lidershipit akademik në rajonin e Ballkanit Perëndimor.
