Promovohet turizmi kulturor në Viti përmes shtegut të Nënës Terezë
Kryetari i Komunës së Vitisë, Sokol Haliti, ka pritur sot përfaqësuesit e Organizatës “Swisscontact”, në kuadër të projektit FEGO, ku është prezantuar projekti për zhvillimin e turizmit dhe promovimin e resurseve turistike të kësaj komune.
Gjatë takimit u shpalosën aktivitetet kryesore të projektit “Gjurmëve të Nënës Terezë”, i cili parasheh rregullimin dhe shenjëzimin e shtegut kulturor. Projekti do të përfshijë vendosjen e tabelave orientuese për udhëtarët që vijnë nga drejtimi i Shkupit dhe Prishtinës, tabela interpretuese në lokalitete të trashëgimisë kulturore, si dhe përgatitjen e broshurave dhe hartave informuese për vizitorët.
Ky projekt financohet nga Agjencia Suedeze për Zhvillim dhe Bashkëpunim Ndërkombëtar (Sida) dhe do të realizohet përmes një modeli bashkëfinancimi me Komunën e Vitisë.
Kryetari Haliti theksoi rëndësinë e këtij bashkëpunimi, duke potencuar se shtegu “Gjurmëve të Nënës Terezë” do të shndërrohet në një atraksion kulturor e turistik për vizitorët vendas dhe ndërkombëtarë. Ai shtoi se Vitia tashmë ka investuar në infrastrukturë që ndërlidhet me vendet turistike dhe ka potencial të madh për zhvillimin e turizmit lokal.
Në takim morën pjesë edhe klerikët Dom Lush Gjergji e Dom Fatmir Koliqi, kryetari i fshatit Stubëll, Marjan Ramaj, si dhe përfaqësues të tjerë lokalë.
