Nga Gjilani në Mesdhe – Betim Maliqi fiton medaljen e argjendtë
Karateisti gjilanas, Betim Maliqi, ka shkëlqyer në Kampionatin Mesdhetar të Karatesë – edicioni i 31-të, që u zhvillua nga 11-14 shtator në Guadalajara të Spanjës, duke fituar medaljen e argjendtë.
Kryetari i Komunës së Gjilanit, Alban Hyseni, e ka uruar kampionin për këtë sukses të madh, duke theksuar se Betimi na bëri krenar me paraqitjen e tij.
“Me një luftë të fortë dhe angazhim të jashtëzakonshëm, Betimi arriti finalen dhe fitoi medaljen e argjendtë, duke mposhtur kundërshtarë të fuqishëm nga Qipro, Greqia dhe Franca. Ky është një sukses i madh për të, për Fortesën dhe për Gjilanin tonë”, tha Hyseni.
Ndryshe, në këtë kampionat, Kosova u rendit e dyta pas Spanjës, duke u përfaqësuar me 49 garues që fituan gjithsej 7 medalje të arta, 4 të argjendta, 5 të bronzta dhe 7 vende të pesta.
